گوگل کروم نے صارفین کیلئے نیا فیچر متعارف کرادیا ہے۔

دنیا بھر میں ویب براؤزنگ کے لیے سب سے زیادہ گوگل کروم کا استعمال کیا جاتا ہے جس میں اکثر ٹیبز میں اوپن ویب سائٹس کو تلاش کرنا مشکل ہو جاتا ہے۔

صارفین کی اس مشکل کو مدنظر رکھتے ہوئے گوگل کروم نے ایسے بہترین شارٹ کٹس متعارف کروائے ہیں جن سے صارفین کی تمام مشکلات حل ہو جائیں گی۔

یہ فیچر 3 شارٹ کٹس پر مبنی ہے جس سے ٹیبز، بک مارکس اور ہسٹری میں مطلوبہ مواد ڈھونڈنا آسان ہوجاتا ہے۔

اس مقصد کے لیے کروم میں ایڈریس بار میں @ ٹائپ کریں تو نیچے ٹیبز، بک مارکس اور ہسٹری کے آپشن نظر آجائیں گے۔

اگر آپ نے کروم پر بہت زیادہ ٹیبز اوپن کی ہوئی ہیں تو @ ٹائپ کرنے کے بعد نیچے سرچ ٹیب پر کلک کرکے مطلوبہ ویب سائٹ کا نام ٹائپ کرکے انٹر کلک کریں، ایسا کرنے پر مطلوبہ ٹیب اوپن ہوجائے گی۔

اسی طرح @ ٹائپ کرکے سرچ بک مارکس پر کلک کرکے مطلوبہ سائٹ کا نام درج کرنے پر اس کا بک مارک مل جائے گا۔

اس کے علاوہ ایک اور آپشن @ ہسٹری کا ہے جس سے براؤزنگ ہسٹری میں ایسی سائٹس کو ڈھونڈ سکتے ہیں جن پر وزٹ تو کیا مگر انہیں بک مارک میں محفوظ نہیں کیا۔

اس کے لیے بھی ایڈریس بار میں @ ٹائپ کرکے نیچے ہسٹری سرچ پر کلک کرکے مطلوبہ سائٹ کے کی ورڈ کا اندراج کریں۔