گوگل نے اپنے آرٹی فیشل انٹیلی جنس (اے آئی) ٹیکنالوجی سے لیس چیٹ بوٹ بارڈ تک لوگوں کو رسائی دینے کا سلسلہ شروع کردیا ہے۔

معروف سرچ انجن گوگل کے مطابق بارڈ کی جانچ پڑتال کے دوران ہم نے کافی کچھ سیکھا اور اب زیادہ سے زیادہ افراد کا فیڈ بیک حاصل کیا جائے گا۔

اس چیٹ بوٹ کے لیے گوگل نے اپنی تیار کردہ لینگوئج ٹیکنالوجی ایل اے ایم ڈی اے (LaMDA) کو استعمال کیا ہے۔

گوگل کی اس سروس کا مقصد صارفین کو مختلف موضوعات پر تفصیلات آڈیو، ویڈیو، تصاویر اور دیگر ذرائع سے پیش کرنا ہے۔

یہ بھی پڑھیں: گوگل کروم کا وہ خفیہ فیچر جو آپ کو ضرور پسند آئے گا

کمپنی کا کہنا ہے کہ جب بارڈ کو استعمال کیا جائے گا تو چیٹ بوٹ کی جانب سے صارفین کو چند ڈرافٹس فراہم کیے جائیں گے تاکہ وہ بہترین کا انتخاب کر سکیں۔

آپ بارڈ سے ضمنی سوالات بھی پوچھ سکیں گے اور اگر آپ کوئی متبادل آپشن چاہتے ہیں تو اس کے لیے بھی بارڈ کو آزما سکتے ہیں۔

گوگل نے کہا کہ بارڈ کو بہتر بنانے کا سلسلہ جاری رہے گا اور آنے والے وقت میں اس میں مزید فیچرز کا اضافہ کیا جائے گا۔

گوگل کا مزید کہنا تھا کہ بارڈ کی تیاری میں کمپنی کے اے آئی اخلاقی اصولوں کو مدنظر رکھا جا رہا ہے اور صارفین کے لیے معیار اور تحفظ کو ترجیح دی جائے گی۔

یہ بھی پڑھیں: گوگل پر درست سرچ نتائج کے لیے مددگار آسان ٹپس