کیا آپ کے فون کی بھی بیٹری تھریڈز استعمال کرنیکے بعد جلدی گِر رہی ہے؟ اگر ایسا ہے تو آج ہم آپ کو اس سے بچنے کا آسان طریقہ بتائیں گے۔

حال ہی میں نئی ایپ تھریڈز کو متعارف کروایا گیا تھا اور اس کے صارفین کی تعداد 5 دن کے اندر 10 کروڑ سے زائد ہوگئی تھی جس کے بعد اسے ٹک ٹاک سے زیادہ مقبول ایپ قرار دیا جارہا تھا۔

تاہم اب سوشل میڈیا صارفین نے دعویٰ کیا ہے کہ ان کے فون کی بیٹریز جلد ڈرین ہورہی ہیں اور یہ سب تھریڈز ڈاؤن لوڈ کرنے کے بعد ہوا۔

ایک صارف نے بتایا کہ ان کے فون کی بیٹری جلد ختم ہورہی ہے، ساتھ ہی سوال کیا کہ کیا یہ مسئلہ کسی اور کو بھی درپیش ہے؟

ایک اور صارف نے پوچھا کہ کیا تھریڈز آئی فون کی بیٹری زیادہ پی رہا ہے یا حال ہی میں آئی فونز میں کچھ تبدیلی ہوئی ہے؟ ان دنوں میرے فون کی بیٹری معمول سے زیادہ گِر رہی ہے۔

ان گنت صارفین کی جانب سے یہ ہی دعویٰ کیا گیا لیکن تاحال میٹا کی جانب سے اس حوالے سے کوئی بیان سامنے نہیں آیا۔

دوسری جانب ایک رپورٹ کے مطابق موبائل کی بیٹری کے جلد ختم ہونے کی وجہ ابھی تک واضح نہیں ہے، اسی سلسلے میں ای ایس ای ٹی کے سائبر سکیورٹی کے ماہر جیک مورے کا خیال ہے کہ یہ ‘منفی ٹیسٹنگ’ کے باعث ہوسکتا ہے۔

اب یہاں سوال یہ ہے کہ اس سے محفوظ رہنے کے لیے کیا کیا جائے؟ تو آئیں ہم آپ کو بتاتے ہیں۔

اگر آپ نے تھریڈز ڈاؤن لوڈ کرنے کے بعد دیکھا ہے کہ آپ کی بیٹری بھی جلد ختم ہورہی ہے، تو یقینی بنائیں کہ آپ اپنے فون کی بیک گراؤنڈ ایپ ریفریش سیٹنگ کو بند کر دیں۔

یہ سیٹنگ ایپس کو اپ ڈیٹس اور نئے مواد کی جانچ کرنے کی اجازت دیتی ہے، یہاں تک کہ جب ان کا استعمال زیادہ نہ ہورہا ہو تب بھی، اور اس طرح آپ کی بیٹری تیزی سے ڈرین ہوجاتی ہے۔

اگر آپ اپنے فون کی بیک گراؤنڈ ایپ ریفریش سیٹنگ کو بند کر دیں تو فون کی بیٹری کو بچا سکیں گے۔