گوگل نے نیا اے آئی ٹول لانچ کردیا ہے جو تصویروں کو آواز کے ساتھ اب ویڈیو میں تبدیل کرے گا۔

گوگل نے اپنے جیمینی اے آئی سوٹ کے تحت ویو 3 میں ایک نیا فیچر متعارف کرادیا ہے جو صارفین کو تصویروں سے آٹھ سیکنڈ کی ویڈیو کلپس تیار کرنے کی سہولت دیتا ہے اور وہ بھی آواز کے ساتھ۔

یہ فیچر اب چند منتخب ممالک میں دستیاب ہے جن میں پاکستان بھی شامل ہے جب کہ یہ فیچرگوگل اے آئی پرو اور الٹرا سبسکرائبرز کے لیے دستیاب ہے۔

یہ کیسے کام کرتا ہے؟

صارفین جب پرامپٹ باکس میں ویڈیوز کا آپشن منتخب کرتے ہیں تو انہیں تصویر اپلوڈ کرنے اور منظر کی وضاحت کے ساتھ ساتھ کسی بھی آڈیو کی تفصیل فراہم کرنے کا موقع ملتا ہے۔

اس کے بعد سسٹم صارف کے ان پٹس کی بنیاد پر ایک مکمل آٹھ سیکنڈ کی ویڈیو تیار کرتا ہے جس میں آڈیو بھی شامل ہوتی ہے۔ تیار شدہ ویڈیو کو ڈاؤن لوڈ یا شیئر بھی کیا جاسکتا ہے۔

شفافیت اور سیکیورٹی کو یقینی بنانے کے لیے اقدامات

گوگل کی جانب سے تمام اے آئی سے تیار کردہ ویڈیوز میں ایک واضح واٹر مارک اور ایک خفیہ سنتھ آئی ڈی ڈیجیٹل واٹرمارک شامل کیا جاتا ہے تاکہ ان کی شناخت ممکن ہو۔

صارفین کو ویڈیوز پر تھمز اپ یا تھمز ڈاؤن کے ذریعے فیڈ بیک دینے کی بھی سہولت دی گئی ہے جس سے گوگل اپنی ٹیکنالوجی کو مزید بہتر بنا رہا ہے۔

گوگل کے مطابق وہ ان سسٹمز کو ممکنہ غلط استعمال سے محفوظ رکھنے کے لیے باقاعدگی سے ’’ریڈ ٹیمینگ‘‘ مشقیں کرتا ہے جن کے ذریعے خطرات کی پیشگی نشاندہی اور روک تھام کی جاتی ہے۔

اسی کے ساتھ ساتھ کمپنی غیر محفوظ مواد سے متعلق اپنی پالیسیوں پر بھی سختی سے عملدرآمد یقینی بناتی ہے اور صارفین کی رائے کو خاص اہمیت دیتی ہے۔

ویو 3 کا حصہ، فلو میں بھی انضمام

یہ نئی فیچر گوگل کے اے آئی فلم سازی ٹول ’فلو‘ میں بھی شامل کردیا گیا ہے۔ گوگل کے مطابق پچھلے سات ہفتوں میں 4 کروڑ سے زائد ویڈیوز ویو 3 اور فلو کے ذریعے تیار کی جاچکی ہیں اور اب تصویر سے ویڈیو بنانے کی صلاحیت اس پلیٹ فارم کی مقبولیت میں مزید اضافہ کرے گی۔