دنیا کی مقبول ترین میسجنگ ایپ واٹس ایپ نے اسٹیٹس شیئر کرنے والے صارفین کے لیے ایک نیا اور اہم فیچر متعارف کروانے کی تیاری شروع کر دی ہے، جس سے پرائیویسی کا کنٹرول مزید بہتر ہو جائے گا۔

میٹا کی ملکیت میں کام کرنے والی اس ایپلیکیشن نے رواں سال متعدد جدید فیچرز متعارف کروائے ہیں، جن کا مقصد نہ صرف صارفین کو سہولت فراہم کرنا ہے بلکہ دیگر ایپس پر سبقت حاصل کرنا بھی ہے۔

تازہ رپورٹ کے مطابق واٹس ایپ جلد ہی iOS صارفین کے لیے نیا فیچر “اسٹیٹس اپ ڈیٹس وِد کلوز فرینڈز” متعارف کرانے جا رہا ہے۔ اس فیچر کے ذریعے صارفین اپنی قریبی دوستوں کی ایک مخصوص فہرست بنا سکیں گے، جس کے بعد اسٹیٹس اپ ڈیٹس صرف اسی منتخب لسٹ میں شامل افراد کو نظر آئیں گے۔

یہ فیچر انسٹاگرام کے ‘کلوز فرینڈز’ آپشن سے مشابہت رکھتا ہے، جہاں صارفین مخصوص افراد کے ساتھ اپنی پوسٹس اور اسٹیٹس شیئر کرتے ہیں۔

تاہم، معروف ٹیک ویب سائٹ واٹس ایپ بیٹا انفو نے واضح کیا ہے کہ فی الحال یہ فیچر آزمائشی مراحل میں ہے اور اس کی تمام صارفین تک دستیابی کی تاریخ کا اعلان ابھی نہیں کیا گیا۔