انسٹنٹ میسجنگ ایپلی کیشن واٹس ایپ نے ایپل واچ کے لیے اپنے ایپ ورژن کی آزمائش (بیٹا ٹیسٹنگ) کا آغاز کر دیا ہے۔

واٹس ایپ بیٹا انفو کی رپورٹ کے مطابق اس نئے ورژن کے ذریعے ایپل واچ صارفین اپنی چیٹ لسٹ میں موجود میسجز اور میڈیا فائلز دیکھ سکیں گے، نوٹیفکیشن کا انتظار کیے بغیر نئے پیغامات بھیج سکیں گے اور ایموجیز کے ذریعے میسج ری ایکشنز بھی دے سکیں گے۔

رپورٹ میں مزید بتایا گیا ہے کہ صارفین اس ورژن میں آڈیو میسجز بھیجنے کے ساتھ ساتھ وائس ان پٹ فیچر کے ذریعے پیغامات لکھوا بھی سکیں گے۔

تاہم، ایپل واچ پر واٹس ایپ استعمال کرنے کے لیے اسے واٹس ایپ انسٹال شدہ آئی فون سے کنیکٹ رکھنا ضروری ہوگا۔

ایپ کا یہ نیا ورژن فی الحال بیٹا مرحلے میں ہے، اور اسے حاصل کرنے کے لیے صارفین کو iOS کے لیے واٹس ایپ بیٹا ورژن 25.32.10.71 انسٹال کرنا ہوگا۔