ماہرین کا کہنا ہے کہ جوڑوں کے ایک ساتھ گزارے گئے برسوں اور شخصی طور پر ایک دوسرے سے مماثلت میں کوئی تعلق موجود نہیں۔

حال ہی میں کی گئی ایک تحقیق سے یہ بات سامنے آئی ہے کہ درحقیقت لوگ لاشعوری طور پر ایسے شریک حیات کو ترجیح دیتے ہیں جو شخصیت کے اعتبار سے ان سے ملتا جلتا ہو۔

تحقیق اس سوال کو مدنظر رکھتے ہوئے کی گئی کہ کیا وقت گزرنے سے ایک دوسرے کا ساتھ جوڑوں پر اثرات مرتب کرتا ہے یا آغاز سے ہی وہ ایک دوسرے سے ملتے جلتے ہوتے ہیں۔

اس سوال کو حل کرنے کیلئے تحقیق میں 1396 جوڑوں کو شامل کیا گیا جن کی شادی کو 2 سے 19 سال کا عرصہ ہوچکا تھا۔

 ان جوڑوں سے 198 سوالات پوچھے گئے تاکہ ان کی شخصیت اور رویوں کا علم ہوسکے۔

تحقیق کے نتائج سے معلوم ہوا کہ جوڑوں کے ایک ساتھ گزارے گئے برسوں اور شخصی طور پر ایک دوسرے سے مماثلت میں کوئی تعلق موجود نہیں۔

محققین کا کہنا ہے کہ درحقیقت جوڑے بتدریج ملتی جلتی شخصیت کے مالک نہیں بنتے بلکہ عموماً شریک حیات کے انتخاب میں ہی اس چیز کو مدنظر رکھا جاتا ہے۔

اس کے علاوہ محققین کا کہنا ہے کہ اس رجحان میں جارحیت استثنیٰ ہے۔

  ماہرین کا کہنا ہے کہ اگر شادی شدہ جوڑے میں ایک تشدد پسند ہو تو دوسرے فرد کا ردعمل بھی ممکنہ طور پر ویسا ہی ہوگا اور وقت کے ساتھ وہ بھی زیادہ جارحیت پسند ہوجائے گا۔