واشنگٹن: امریکہ کے نو منتخب صدر ڈونلڈ ٹرمپ نے جیت کے بعد عوام کا شکریہ ادا کرتے ہوئے کہا ہے کہ یہ ایک بڑی سیاسی جیت ہے۔

ڈونلڈ ٹرمپ نے 2024 کے صدارتی الیکشن جیتنے کے بعد قوم سے پہلے خطاب میں کہا کہ شاندار تحریک چلانے پر حامیوں کا شکر گزار ہوں، ہم ایک تاریخ رقم کرنے جارہے ہیں ، یہ بہت بڑی سیاسی جیت ہے۔

انہوں نے کہا کہ امریکہ کو بہتر کرنے کی ضرورت ہے، امریکہ کے زخموں پر مرہم رکھیں گے، یہ امریکیوں کی شاندار فتح ہے۔

ٹرمپ کا کہنا تھا کہ بہترین انتخابی مہم چلائی یہ امریکہ کی سیاسی جیت ہے، آپ کے ووٹ کے بغیر میری جیت ممکن نہیں تھی، مجھے 315 الیکٹورل ووٹ جیتنے کی امید تھی، امریکی عوام نے ایک بار پھرغیرمعمولی مینڈیٹ دیا ہے، ہم نے سوئنگ ریاستوں کے میدان میں کامیابی حاصل کی، امریکی سینیٹ میں ہماری کامیابی انتہائی غیرمعمولی ہے۔

نو منتخب صدر نے کہا کہ امریکہ کے سنہری دور کا آغاز ہونے والا ہے، امریکہ کو دوبارہ عظیم بنائیں گے، اس وقت تک خاموش نہیں بیٹھوں گا جب تک آپ کے خواب پورے نہ کروں۔

ڈونلڈ ٹرمپ نے کہا کہ امریکہ کے تمام معاملات اب ٹھیک ہونے والے ہیں، ایک بار پھر امریکہ کو ترقی کی جانب لے جانے کا وقت آگیا، امریکہ کو محفوظ بنائیں گے، سرحدوں کو سیل کریں گے، امریکہ میں جو بھی آئے گا وہ قانونی طریقے سے ہی آئے گا۔

انہوں نے کہا کہ صدارت کے اس سفر پر اہلیہ کا شکریہ ادا کرتا ہوں، ایسی سیاسی جیت اس سے پہلے کہیں نہیں دیکھی، چیلنجز سے نمٹنے کے لیے اقدامات کریں گے، ہر روز آپ کے حقوق کے لیے لڑوں گا۔

اپنے خطاب کے دوران نومنتخب امریکی صدر نے ایلون مسک کی تعریف کی اور کہا کہ ایلون مسک ذہین اور سمجھدار آدمی ہیں۔

ڈونلڈ ٹرمپ کا کہنا تھا کہ ہم نے جن مشکلات کا سامنا کیا وہ کبھی کسی کو نہیں کرنا پڑا، ہم نے جن مشکلات کا سامنا کیا وہ کبھی کسی کو نہیں کرنا پڑا، ہمیں تاریخی فتح کسی مقصد کے لیے ملی ہے، کامیابی دلوانے پر امریکی عوام کی خدمت کر کے اس کا صلہ دیں گے۔

نومنتخب امریکی صدر نے مزید کہا کہ عوام سے کیے وعدوں سے ہرگز پیچھے نہیں ہٹوں گا، امریکی عوام 4 سال کی تقسیم کو پیچھے چھوڑ کر میرا ساتھ دیں، اپنی بھرپور توانائی کے ساتھ امریکہ کی خدمت کروں گا، ٹیکسز میں کمی لاکر امریکی عوام کو ریلیف دیں گے۔

واضح رہے کہ ڈونلڈ ٹرمپ کی جیت کے ساتھ، وہ 100 سال سے زائد عرصے میں دو بار مسلسل کامیابی حاصل کرنے والے پہلے صدر بن گئے۔