امریکا میں صدارتی انتخاب میں ری پبلکن امیدوار کی فتح پر نو منتخب ڈونلڈ ٹرمپ کو عالمی رہنماؤں کی جانب سے مبارک باد کے پیغامات کا سلسلہ جاری ہے۔

اسرائیلی وزیر اعظم بنجمن نیتن یاہو نے ڈونلڈ ٹرمپ کو ‘تاریخ کی سب سے بڑی واپسی’ پر مبارکباد دی ہے۔

نیتن یاہو نے امریکی صدارتی انتخابات میں ٹرمپ کی فتح کے بعد ایکس پر کہا کہ وائٹ ہاؤس میں آپ کی تاریخی واپسی امریکہ کے لیے ایک نئی شروعات، اسرائیل اور امریکہ کے درمیان عظیم اتحاد کے لیے ایک مضبوط عزم کی پیشکش کرتی ہے، یہ ایک بہت بڑی فتح ہے۔

دوسری جانب یوکرین کے صدر ولادیمیر زیلینسکی نے بھی ڈونلڈ ٹرمپ کو ان کی شاندار انتخابی جیت پر مبارکباد دی۔

برطانیہ کے وزیرِ اعظم کیئر اسٹارمر نے بھی اپنے پیغام میں کہا کہ نو منتخب صدر ڈونلڈ ٹرمپ کو تاریخی کامیابی پر مبارکباد پیش کرتا ہوں۔

انہوں نے مزید کہا کہ آنے والے برسوں میں برطانیہ اور امریکہ آزادی، جمہوریت اور دیگر امور میں مشترکہ اقدار کے دفاع کے لیے کندھے سے کندھا ملا کر کھڑے ہوں گے۔

واضح رہے کہ صدارتی انتخابات میں ڈونلڈ ٹرمپ ایک بار پھر امریکی صدر منتخب ہوگئے۔ ڈونلڈ ٹرمپ نے مشرقی انڈیانا، کینٹکی اور مغربی ورجینیا سمیت 27 ریاستوں میں میدان مارا جبکہ کملاہیرس نے 19 ریاستوں میں کامیابی حاصل کی۔

امریکی صدارتی انتخاب میں 538 میں سے ریپبلکن امیدوار ڈونلڈ ٹرمپ نے 277 اور ڈیموکریٹ امیدوار کملا ہیرس نے 226 الیکٹورل ووٹ حاصل کیے۔

کسی بھی امیدوار کو جیت کے لیے کل 538 میں سے کم از کم 270 الیکٹورل ووٹ درکار ہوتے ہیں۔