کراچی میں سردی کی لہر برقرار ہے،محکمہ موسمیات کا کہناہے کہ شہر میں  آج مطلع جزوی طور پر ابر آلود رہےگا۔

محکمہ موسمیات کے مطابق کراچی میں آج صبح کے وقت درجہ حرارت 10 ڈگری سینٹی گریڈ ریکارڈ کیا گیا، دن کے وقت زیادہ سے زیادہ درجہ حرارت 25 ڈگری سینٹی گریڈ تک جانے کا امکان ہے۔

محکمہ موسمیات نے بتایا کہ سائبرین ہواؤں کی رفتار کم ہونے پر صبح اور شام کے وقت سردی بڑھ گئی، شہر  میں اس وقت ہوا میں نمی کا تناسب 53 فیصد ہےجبکہ 9 کلومیٹر فی گھنٹہ کی رفتار سے ہوائیں چل رہی ہیں۔

محکمہ موسمیات کے مطابق  آج موسم دن میں خشک اور رات میں سرد رہنے کا امکان ہے۔

دوسری جانب پنجاب کے میدانی علاقوں میں ایک بار پھر دھند پڑنے کا سلسلہ شروع ہوگیا، شدید دھند پڑنےکےباعث موٹروے کو بھی کچھ مقامات پرٹریفک کے لیے بند کر دیا گیا۔

لاہور سمیت جنوبی پنجاب کے بیشتر شہروں میں دھند پڑنے کا سلسلہ ایک بار پھر شروع ہوگیا ہے،شدید دھند کے باعث ملتان سے خانیوال موٹروے اور موٹروے ایم 5 جلال پورپیر والاسےملتان تک ٹریفک کے لیے بند ہے۔

ترجمان موٹر وے پولیس کے مطابق قومی شاہراہ پرٹھوکر، مانگا منڈی، پھول نگر، جمبر، پتوکی، رینالہ خورد، اوکاڑہ، ساہیوال، ہڑپہ، چیچہ وطنی، میاں چنوں، خانیوال، ملتان، بستی ملوک ، لودھراں اور بہاولپور میں بھی دھند ہے جس کے باعث قومی شاہراہ پر حد نگاہ 30 میٹر تک ہوگئی ہے۔

موٹروےپولیس نے شہریوں کو دھند کے دوران فوگ لائٹس کے استعمال اور غیر ضروری سفر نہ کرنے کی ہدایت کی ہے ۔