محکمہ موسمیات نے ملک بھر میں  بارشوں کی پیشگوئی کردی ہے۔

تفصیلات کے مطابق محکمہ موسمیات نے آج سے ملک کے مختلف حصوں میں بارشوں اور پہاڑوں پر برف باری کی پیش گوئی کی ہے۔

محکمہ موسمیات کا کہنا ہے کہ ملکہ کوہسار مری میں آج اور کل برفباری کا امکان ہے جبکہ گلیات میں بھی برفباری متوقع ہے۔

اس کے علاوہ اسلام آباد، راولپنڈی، لاہور، گوجرانوالہ، سیالکوٹ اور پشاور سمیت کئی شہروں میں بادل برسیں گے۔

محکمہ موسمیات کا کہنا ہے کہ مغربی ہوائیں بالائی علاقوں میں داخل ہونے سے آج اور کل بارش ہوگی، بارش کا سلسلہ بدھ کی صبح تک جاری رہ سکتا ہے۔

خیبر پختونخوا میں پی ڈی ایم اے نے  ضلعی انتظامیہ کو الرٹ رہنے کی ہدایت کی ہے۔

وفاقی دارالحکومت اسلام آباد میں ٹھنڈ اور بادلوں کے ڈیرے ہیں، محکمہ موسمیات نے آئندہ 24 گھنٹے کے دوران بارش کی پیشگوئی کی ہے۔ پنجاب کے میدانی علاقے دھند کی لپیٹ میں ہیں۔

 محکمہ موسمیات  کا کہنا ہے کے بارش کے بعد اسموگ میں کمی اور دھند میں اضافہ ہوگا، حالیہ اسپیل کے بعد سردی کی شدت میں مزید اضافہ ہوگا۔