کراچی میں آج سے گرمی کی شدت میں کمی کا امکان ہے۔

محکمہ موسمیات کے مطابق شہر قائد کا موسم آج بھی گرم اور خشک رہے گا، تاہم کراچی میں سورج آج بھی آگ برسا رہا ہے، شہر میں تیز دھوپ نے گرمی کی شدت بڑھادی ہے۔

محکمہ موسمیات نے بتایا کہ شہر میں آج سے سمندری ہوائیں بحال ہوجائیں گی، جس کے بعد گرمی کی شدت میں کمی آئے گی۔

محکمہ موسمیات کا کہنا تھا کہ گزشتہ 24 گھنٹوں کے دوران شہر کا کم سے کم درجہ حرارت 20 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 35 تا 37 ڈگری سینٹی گریڈ تک ریکارڈ رہنے کا امکان ہے۔

محکمہ موسمیات نے بتایا کہ شہر میں چلنے والی ہوا میں نمی کا تناسب 77 فیصد ہے اور شمال مشرقی سے چلنے والی ہواؤں کی رفتار 8 تا 10 کلو میٹر فی گھنٹہ ہے۔

محکمہ موسمیات کے مطابق شہر میں آج مطلع صاف رہے گا جبکہ آئندہ ہفتے تک بارش کا کوئی امکان نہیں ہے۔