کراچی میں آج بھی بارش ہوگی، محکمہ موسمیات نے خبردار کر دیا ہے کہ کراچی میں آج بھی بادل برسیں گے۔

محکمہ موسمیات نے پیشگوئی کرتے ہوئے کہا کہ شہر قائد میں مون سون ہواؤں کے زیر اثر شہر میں آج بھی شام اور رات میں گرج چمک کے ساتھ بارش کا امکان ہے۔

شہر میں اس وقت مطلع جزوی ابر آلود، موسم گرم اور مرطوب ہے جبکہ موجودہ درجہ حرارت 31 ڈگری سینٹی گریڈ ہے۔

محکمہ موسمیات نے بتایا کہ کراچی کا آج زیادہ سے زیادہ درجہ حرارت 37 ڈگری سینٹی گریڈ تک جانے کا امکان ہے جبکہ اس وقت گرمی کی شدت 38 ڈگری سینٹی گریڈ تک محسوس کی جارہی ہے اور ہوا میں نمی کا تناسب 78 فیصد ہے۔

واضح رہے کہ گزشتہ روز شہر قائد کے مختلف علاقوں میں کہیں تیز اور کہیں ہلکی بارش کا آغاز ہوگیا تھا۔

کراچی کے علاقے بحریہ ٹاؤن، سرجانی ٹاؤن، اسکیم 33، خدا کی بستی اور گلشن حدید میں گہرے کالے بادل چھا گئے تھے اور تیز آندھی کے ساتھ ہلکی بارش ہوگئی تھی۔