کراچی: محکمہ موسمیات نے شہر قائد کے موسم کے حوالے سے پیش گوئی کرتے ہوئے کہا ہے کہ آج ایک اور گرم دن متوقع ہے، پارہ 37 ڈگری تک پہنچنے کا امکان ہے۔

محکمہ موسمیات کے مطابق کراچی میں آج کم سے کم درجہ حرارت 29 ڈگری سینٹی گریڈ ریکارڈ کیا گیا جبکہ شہر کا موسم اس وقت بھی شدید گرم اور مرطوب محسوس کیا جا رہا ہے اور آج دن کے اوقات میں بھی موسم نہایت گرم رہے گا۔

اس وقت شہر کا درجہ حرارت 32 ڈگری سینٹی گریڈ جبکہ گرمی کی شدت 35 ڈگری سینٹی گریڈ تک محسوس کی جارہی ہے۔

محکمہ موسمیات نے بتایا ہے کہ شہر میں اس وقت 15 کلو میٹر فی گھنٹہ کی رفتار سے جنوب مغربی ہوا چل رہی ہے جبکہ آج مطلع صاف رہے گا تاہم بارش کا امکان نہیں ہے۔

واضح رہے کہ ساحلی علاقوں کے علاوہ سندھ بھر ہیٹ ویو کی لپیٹ میں ہے، تاہم ملک میں ہیٹ ویو کا سلسلہ 24 مئی تک جاری رہے گا۔

ماہرین صحت نے ہیٹ ویو کے پیش نظر کراچی کے شہریوں کو احتیاط کی ہدایت کرتے ہوئے کہا ہے کہ شہری صبح 11 سے شام 4 بجے تک غیر ضروری طور پر گھروں سے باہر نہ نکلیں۔