کراچی: محکمہ موسمیات نے شہر قائد میں آج بھی بوندا باندی اور ہلکی بارش کا امکان ظاہر کیا ہے۔

محکمہ موسمیات کے مطابق کراچی میں آج مطلع جزوی طور پر ابر آلود رہے گا جبکہ شہر کے مختلف علاقوں میں ہلکی بارش یا بوندا باندی متوقع ہے، تاہم مغربی ہواؤں کے زیرِ اثر بارش کا یہ سلسلہ کل تک جاری رہنے کا امکان ہے۔

محکمہ موسمیات نے بتایا ہے کہ شہر کا زیادہ سے زیادہ درجہ حرارت آج 32 ڈگری سینٹی گریڈ تک جا سکتا ہے۔

سمندری ہوائیں بحال ہو چکی ہیں اور نمی کا تناسب بڑھنے کے باعث موسم خاصا مرطوب محسوس ہو رہا ہے۔

محکمہ موسمیات کے مطابق جنوب مغربی سمت سے ہوائیں 7 کلومیٹر فی گھنٹہ کی رفتار سے چل رہی ہیں جبکہ ہوا میں نمی کا تناسب 85 فیصد ریکارڈ کیا گیا ہے۔

ادھر محکمہ موسمیات نے پیشگوئی کی ہے کہ مون سون بارشوں کا دوسرا اسپیل ملک بھر میں 5 جولائی سے اثر انداز ہوگا، جس سے مزید بارشوں کی توقع ہے۔