ملک کے مختلف شہروں میں مون سون کا طاقتور اسپیل جاری ہے، جس کے نتیجے میں شدید بارشوں نے نظام زندگی درہم برہم کر دیا ہے۔

کئی علاقوں میں پانی گھروں میں داخل ہو چکا ہے جبکہ نشیبی علاقے زیرِ آب آ گئے ہیں اور برساتی ندی نالوں میں طغیانی کا خطرہ بڑھ گیا ہے۔

لاہور کے متعدد علاقے جیسے لکشمی چوک، مال روڈ، سمن آباد، چوبرجی، اقبال ٹاؤن، فیروزپور روڈ اور جوہر ٹاؤن شدید بارش سے متاثر ہوئے ہیں۔

 نشیبی علاقوں میں پانی جمع ہونے سے شہریوں کو شدید مشکلات کا سامنا ہے، کئی علاقوں میں بجلی کی فراہمی بھی معطل ہے۔

اسلام آباد اور راولپنڈی میں بھی موسلا دھار بارشوں کے باعث سڑکوں پر پانی جمع ہو گیا جبکہ فیصل آباد، گجرات، ننکانہ صاحب، قصور، سیالکوٹ، نارووال اور حافظ آباد سمیت پنجاب کے دیگر شہروں میں بھی بارشوں سے معمولات زندگی متاثر ہوئے ہیں۔

بلوچستان کے مختلف شہروں جیسے نصیر آباد، قمبر، ڈیرہ مراد جمالی، صحبت پور اور جھل مگسی میں بھی بارش نے موسم خوشگوار بنا دیا، تاہم بعض مقامات پر شدید بارش سے مقامی آبادی کو مشکلات کا سامنا ہے۔

ادھر آزاد کشمیر اور گلگت بلتستان میں شدید بارشوں کے باعث ندی نالوں میں طغیانی اور سیلابی صورتحال پیدا ہو گئی ہے جس کے باعث حکام نے الرٹ جاری کر دیا ہے۔

دوسری جانب کراچی میں بھی صبح کے وقت ہلکی بارش اور بوندا باندی نے موسم کو خوشگوار بنایا اور مزید بوندا باندی کا امکان ظاہر کیا جا رہا ہے۔

محکمہ موسمیات کے مطابق بارشوں کا یہ سلسلہ 13 جولائی تک جاری رہے گا، شہریوں کو ہدایت کی گئی ہے کہ وہ غیر ضروری سفر سے گریز کریں اور نشیبی علاقوں یا برساتی ندی نالوں کے قریب نہ جائیں تاکہ کسی بھی ممکنہ خطرے سے بچا جا سکے۔