امریکی صدر ڈونلڈ ٹرمپ اور فرانسیسی ہم منصب ایمانویل ماکرون کےدرمیان  ٹیلی فونک رابطہ ہوا ہے ۔

وائٹ ہاؤس ترجمان کےمطابق ٹیلیفونک رابطے میں  ایران کے جوہری پروگرام اور یورینیم کو اعلیٰ سطح پر افزودہ کرنے کے معاملے پر تبادلہ خیال کیاگیا  ۔

 اس کے علاوہ دونوں لیڈروں نے ایران کو جوہری ہتھیاروں کے حصول سے روکنے اور مشرقِ وسطی  کو عدم استحکام سے دوچار کرنے کے تخریبی کردار کے خاتمے پر بھی گفتگو کی ۔
واضح  رہے کہ فرانسیسی صدرماکرون نے ہفتے کے روز ایرانی ہم منصب حسن روحانی سے ایک گھنٹے تک گفتگو کی تھی۔ جس کے بعد ان کا  کہنا تھا کہ فرانس تمام فریقوں کے درمیان مکالمے کی بحالی کےلیے سازگار حالات پیدا کرنا چاہتا ہے ۔

دریں اثنا وائٹ ہاؤس کے قومی سلامتی کے مشیر جان بولٹن نے کہا ہے کہ امریکا ایران کو جوہری ہتھیاروں سے دستبردار کرانے اور اس کو مشرقِ وسطی  میں متشدد سرگرمیوں سے روکنے کے لیے دباؤجاری رکھے گا۔