پیرس میں موجود انڈین سفارتخانہ کے سامنے کشمیری و پاکستانی کمیونٹی کی جانب سے زبردست احتجاجی مظاہرہ کیا گیا۔

بھارت کی طرف سے مقبوضہ کشمیر کے ریاستی درجے کوختم کرنے کی مکروہ سازش کیخلاف پاکستانی وکشمیری کمیونٹی کے اس مظاہرے میں تمام سیاسی و مذہبی جماعتوں کے نمائندوں نے بھرپور شرکت کی۔

مظاہرے میں انٹرنیشنل کشمیر پیس فورم فرانس، جموں و کشمیر فورم فرانس، تحریک انصاف فرانس، مسلم لیگ ن فرانس، پیپلز ہارٹی فرانس، ق لیگ فرانس، منہاج القرآن فرانس، عوامی تحریک فرانس، پشتون آرگنائزیشن فرانس، جموں و کشمیر لبریشن فرنٹ فرانس اور ای یو پاک فرینڈشپ فیڈریشن یورپ اور دیگر بھی بھارت کے خلاف احتجاج میں شریک ہوئے۔

مقررین نے خطاب کرتے ہوئے کہا کہ کہ ان مظاہروں کا مقصد بھارتی کے غیر آئینی اور مکروہ اقدامات کو دنیا کے سامنے لاکر بھارت کا دہشت گردانہ چہرہ دکھانا ہے ،اقوام عالم کو بتانا ہے کہ گزشتہ ستر سال سے مظلوم کشمیری بھارت کی طرف سے ظلم و بربریت کا شکار ہیں اور مودی کے دور حکومت میں کشمیریوں کی نسل کشی کی جارہی ہے۔

احتجاج کے دوران ہم لے کر رہیں گے آزادی کا نعرہ پیرس کی فضا میں گونجتا رہا۔

واضح رہے کہ گذشتہ دنوں پیرس میں ایفل ٹاور کے سامنے بھارتی ریاستی دہشت گردی کے خلاف اور کشمیریوں کے ساتھ یکجہتی کا بھرپور مظاہرہ کیا گیا تھا جس میں پیرس کی فضائیں مودی دہشت گرد ، انڈیا دہشت گرد ، کشمیریوں کا قتل عام بند کرو اور ہم کیا مانگیں آزادی کے نعرے سے گونج اٹھیں تھی۔

مقررین نے مظاہرے سے خطاب کرتے ہوئے کہا کہ مقبوضہ کشمیر میں انسانی حقوق کی کھلم کھلا خلاف ورزی ہو رہی ہے۔