بھارتی ریاست بہار میں موسلا دھار بارش کے دوران آسمانی بجلی گرنے کے واقعات میں 18افراد ہلاک ہوگئے۔

عالمی خبررساں ادارے کے مطابق بھارتی ریاست بہار میں کھیتوں، پہاڑوں اور میدانی علاقوں میں آسمانی بجلی گرنے کے واقعات ہوئے ۔

بہارکےحکام کے مطابق منگل کوموسلادھار بارش کےدوران آسمانی بجلی گرنے سے کم ازکم 18 افرادہلاک ہوگئے۔

بہارڈیزاسٹرمینجمنٹ ڈیپارٹمنٹ کے مطابق، آسمانی بجلی گرنے سے گیا اورکمورمیں 3 افراد کی اموات ہوئیں، جبکہ  پٹنہ،بھوج پور ، مشرقی چمپارن، سیوان اوراروال میں دو، کٹیہاراورجہان آباد اضلاع میں ایک ایک شخص اپنی جان سے گیا۔

ڈیزاسٹرڈپارٹمنٹ کے مطابق منگل کی سہ پہرسےریاست کے متعدد علاقوں میں موسلا دھاربارش ہوئی جو بدھ کی صبح تک جاری رہی۔

محکمہ موسمیات کےمطابق، پٹنہ میں 95.5 ملی میٹر بارش ریکارڈ کی گئی جبکہ دربھنگا میں 75.2 ملی میٹر، ڈہری میں 59.6 ملی میٹر، فوربس گنج 51.4 ملی میٹر ،چھپڑا میں 44.6 ملی میٹر ،سوپال (39.1 ملی میٹر اور مظفر پور میں 21.4 ملی میٹر تک  بارش ہوئی۔

گزشتہ روزبارش سےقبل بہارمیں اس سال بارش کم ریکارڈ کی ہے ،اورریاستی کابینہ نے گزشتہ ہفتے ہی خشک سالی جیسے حالات کے تناظرمیں خصوصی توجہ کے لئے 18 اضلاع کے 102 بلاکس کی نشان دہی کی تھی۔

 بھارتی محکمہ موسمیات (آئی ایم ڈی) نے 19-21 ستمبر کے دوران ممبئی میں ریڈ الرٹ جاری کیا ہے، جس میں ‘زیادہ سے زیادہ’ بارش کی پیش گوئی کی گئی ہے۔ ممبئی کے علاوہ پلوگھر، تھانہ، اور رائے گڑھ کے اضلاع جیسےمختلف مقامات پربھی تیزبارش کاامکان کی پیش گوئی کی ہے ۔

واضح رہے کہ رواں سال جولائی میں بہارمیں مون سون بارشوں کے سلسلے نے بڑے پیمانے پر تباہی مچائی تھی، جس میں صرف ایک ہفتے کے دوران 50 سے زائد افراد ہلاک ہوگئے تھے، زیادہ تر ہلاکتیں آسمانی بجلی گرنے کے باعث ہوئی تھیں ۔آسمانی بجلی گرنے سے 29 افرادہلاک ہوگئے تھے۔