افغان سیکیورٹی فورسز کی مختلف کارروائیوں میں 14 جنگجو ہلاک اور متعدد گرفتار کر لئے گئے۔

ضلعی گورنر کے ترجمان عمر زواک کا کہنا ہے کہ ہلمند میں کارروائی کے دوران 6 غیر ملکیوں سمیت 14 جنگجو ہلاک ہوئے تاہم سویلین افراد کے مارے جانے کی اطلاعات پرتفتیش شروع کردی گئی ہے۔

وزارتِ دفاع کے جاری کردہ بیان کےمطابق موسی قلعہ میں کارروائیوں کے دوران کم از کم 22 غیرملکی طالبان جنگجو ہلاک اور 14 دیگر کو گرفتار کیا گیا ہے۔

گرفتار ہونے والے جنگجووں میں  5 پاکستانی اورایک بنگلہ دیشی بھی شامل ہیں۔

صوبے ہلمند کی صوبائی کونسل کے رکن عطاء اللہ افغان کا کہنا ہے کہ اس حملے کے دوران 35 کے قریب شہری ہلاک ہوئے ہیں جبکہ 13 کے قریب شدید زخمی بھی ہیں۔

عرب خبر رساں ادارے کے مطابق شہری ہلاکتوں کے بعد افغان فوج شدید تنقید کی زد میں ہے، یہ کارروائی رات کے اندھیرے کے دوران کی گئی۔

واضح رہے کہ 19 ستمبر کو ایک امریکی کارروائی کے دوران صوبے ننگر ہارمیں تقریباً 30 کے قریب کسان جاں بحق ہوئے تھے جنہیں کھیتوں میں کام کے دوران فضائی حملوں کے دوران مارا گیا۔

اس سے قبل اقوام متحدہ نے بھی ایک رپورٹ جاری کی تھی جس میں کہا گیا تھا کہ عسکری پسندوں کے حملوں میں اتنے شہری نہیں مارے گئے جتنی نیٹو سمیت افغان آرمی کے حملوں میں مارے گئے ہیں۔

 اس ایک مثال جنوری سے لے کر مارچ تک حکومتی حمایت یافتہ فوج اور امریکی حملوں کے دوران 305 کے قریب لوگ زندگی کی بازی ہار گئے تھے۔