زمبابوے میں 30 سال تک مسلسل صدر رہنے والےرابرٹ موگابے95برس کی عمر میں مختصر علالت کے بعد سنگاپور میں انتقال کر گئے۔

بین الاقوامی خبر رساں ادارے کے مطابق افریقی ملک زمبابوے میں 1987 سے 2017 تک صدر کے عہدے پر براجمان رہنے والے سیاہ فام سیاسی لیڈر رابرٹ موگابے سنگاپور میں دوران علاج انتقال کرگئے۔

غیر  ملکی میڈیا کےمطابق رابرٹ موگابے شدید علیل تھے اور اپریل سے سنگاپور کے اسپتال میں زیر علاج تھے۔

زمبابوے کے سابق صدر کے انتقال کی تصدیق سرکاری سطح پر بھی کر دی گئی ہے، اہل خانہ کا کہنا ہے کہ میت زمبابوے واپس لانے اور آخری رسومات کی ادائیگی کے حوالے سے مشاورت جاری ہے۔ انہیں سرکاری اعزاز کے ساتھ سپرد خاک کیا جائے گا۔

رابرٹ موگابے زمبابوے کی آزادی کے بعد پہلے صدر تھے، وہ 1987 سے 2017 تک زمبابوے کے صدر رہے۔

سفید فام حکومت کے قبضے سے آزادی کے بعد سابق رابرٹ موگابے 1980 سے 1987 تک ملک کے پہلے وزیراعظم کے طور پر فرائض انجام دیتے رہے اور بعد ازاں 1987 سے 2017 تک مسلسل 30 سال تک صدر کے عہدے پر براجمان رہے۔ ایک فوجی بغاوت کے نتیجے میں انہیں مستعفی ہونا پڑا تھا ۔

زمبابوے کے صدر ایمرسن منانگاگوا نے رابرٹ موگابے کی وفات پر گہرے افسوس کا اظہار کیا ہے اور انہیں زمبابوے کا بانی اور آزادی کی علامت قرار دیا۔