بھارتی آرمی چیف کی ایک اورگیدڑ بھبکی، پاکستان پر حملے کی دھمکی دیتے ہوئے بپن راوت نے کہا ہے کہ اس بار وہ بالاکوٹ سے آگے بھی جاسکتے ہیں۔

چنائے میں ایک تقریب سے خطاب کرتے  ہوئے بھارتی آرمی چیف بپن راوت کا کہنا تھا کہ لگتا ہے پاکستان پرانا سبق بھول گیا ہے۔

 انہوں نے کہا  کہ  بالاکوٹ حملے کے بعد وہاں موجود لوگ دوبارہ متحرک ہوگئے ہیں۔ بھارتی آرمی چیف کا مزید کہنا تھا کہ اس بار وہ بالاکوٹ سے کہیں آگے جائیں گے۔

بپن راوت نے یہ دعوی بھی کیا ہے کہ 500 سے زائد دہشت گرد ان کی سرحد پارکرنے کے انتظارمیں ہیں۔

بھارتی آرمی چیف کا مزید کہنا تھا کہ  پاکستان دہشت گردوں کو ہمارے علاقے میں دھکیلنے کے لئے جنگ بندی کی خلاف ورزی کررہا ہے لیکن ہم جانتے ہیں کہ سیز فائرکی خلاف ورزیوں سے کس طرح نمٹنا ہے۔ ہماری فوج جانتی ہے کہ خود کو کس طرح  پوزیشن میں رکھنا  ہے اور کارروائی کرنا ہے۔

ہم  چوکنا ہیں اوریقینی بنائیں گے کہ زیادہ  سے زیادہ  دراندازی کی کوششیں ناکام  بنادیں۔

پاکستان پرکشمیرمیں جنگجووں کی پشت پناہی کا الزام لگاتے ہوئے بپن راوت کا کہنا تھا کہ پاکستان میں وادی کشمیرمیں دہشت گردوں اور ان کے سہولت کاروں کے مابین مواصلات کی خرابی ہورہی ہے لیکن لوگوں کے مابین کوئی مواصلاتی خرابی نہیں ہے۔

 رواں سال 14 فروری کو پلوامہ میں سی آئی ایس ایف کے قافلے پر دہشت گردی کے حملے کے بعد آئی اے ایف نے بالاکوٹ میں جیش محمد کے ایک اہم کیمپ کو نشانہ بنایا اور اسے تباہ کرنے اور اسے ختم کرنے کے لئے متعدد فضائی حملے کیے تھے۔ تاہم جنرل راوت کے مطابق، پاکستان نے بالاکوٹ دہشت گردی کے کیمپ کو دوبارہ سے بحال کیا ہے۔  بھارتی آرمی چیف کے مطابق جیش محمد کے سب سے بڑے دہشت گرد کیمپوں میں سے ایک 6 ایکڑ رقبے میں پھیلا ہوا ہے جو600 عسکریت پسندوں کے رہنے کے لئے کافی ہے۔

واضح رہے کہ اس سے قبل رواں ماہ 13 ستمبر کو بھارتی آرمی چیف نے کشمیر پر حملے کی دھمکی دی تھی ۔