کابل میں ایک خودکش بمبار نے کابل میں افغان اسپیشل فورس کے کیمپ کو نشانہ بنایا، جس میں کم از کم چار کمانڈوز ہلاک ہوگئے۔

 افغان وزارت دفاع  کا کہنا ہے کہ خودکش بمبار نے چہار اسیاب ضلع میں کیمپ کے داخلی راستے پر بارود سے بھری  گاڑی کو دھماکے سے اڑا دیا، جس سے چاروں اسپیشل فورس کے اہلکار ہلاک اور 3 زخمی ہوگئے۔

طالبان کے ترجمان ذبیح اللہ مجاہد نے بیان میں اس حملے کی ذمہ داری قبول کرنے کا دعوی کرتے ہوئے کہا ہے کہ حملے میں کم ازکم  200 سے زائد کمانڈوز ہلاک  ہوئے  ہیں۔

ترجمان کا کہنا ہے کہ مزکورہ حملہ آور نے فوجی  کیمپ میں داخل  ہونے کے بعد خود کو اڑادیا ۔

اس سے قبل گزشتہ ہفتے ہونے والے دو کار بم دھماکوں میں نیٹو افواج کے دو فوجیوں سمیت متعدد افراد ہلاک  جبکہ  30 سے زائد  افراد ذخمی ہوگئے تھے ۔

اس سے قبل رواں  ماہ ہی میں کابل میں بم دھماکہ کیا گیا تھا جس میں  کم ازکم   18 افراد ہلاک جبکہ متعدد  ذخمی ہو گئے تھے، جس کی ذمہ داری بھی طالبان نے قبول کی تھی  ۔

  واضح  رہے کہ امریکی صدر ڈونلڈ ٹرمپ نے رواں  ماہ  8  ستمبر کو اچانک طالبان سے امن مذاکرات  معطل کرنے کا اعلان کیا تھا جس کے بعد  11  ستمبر کو کابل میں راکٹ حملہ کیا گیا تھا ۔