جنوبی کوریا  نے دعویٰ کیا ہے کہ شمالی کوریا  کی جانب سے مزید دو میزائلوں کا تجربہ  کیا گیا ہے۔

غیر ملکی خبر رساں ادارے کے مطابق جنوبی کوریا  کے حکام کا کہنا ہے کہ شمالی کوریا نے دو نامعلوم قسم کے میزائل داغے ہیں۔

جنوبی کوریا کی فوج کے جوائنٹ چیف آف اسٹاف کا کہنا ہے کہ ابھی اس بات کا تعین نہیں کیا جاسکا کہ میزائل کس نوعیت کے ہیں  تاہم جنوبی کوریا کی فوج  اس تمام معاملے پر نظر رکھے ہوئے ہے ۔

دوسری جانب جاپانی کوسٹ گارڈ نے بھی شمالی کوریا  کے میزائل  تجربے کا ذکر کرتے ہوئے بحری جہازوں اور کشتیوں کو مذکورہ مقام پر جانے سے اجتناب کرنے کا کہا ہے۔

اگر اس میزائل تجربے کی تصدیق ہوجاتی ہے تو یہ رواں برس مئی کے مہینے سے اب تک  بارہواں  میزائل تجربہ ہوگا۔

واضح رہے کہ شمالی کوریا کی جانب سے میزائل تجربہ ایسے وقت میں کیاگیا ہےجب پیانگ یانگ اور واشنگٹن کے مابین جوہری مذاکرات تعطل کا شکار ہیں۔