افغانستان کے شہر جلالاباد کی ایک مسجد  میں نماز جمعہ کے دوران دھماکے سے کم از کم 62 افراد جاں بحق جبکہ متعدد زخمی ہوگئے ہیں۔

خبر ایجنسی کے مطابق فوری طور پر دھماکے کی نوعیت کا تعین نہیں کیا جاسکا لیکن جاں بحق افراد میں تمام نمازی ہیں۔

عینی شاہدین کا کہنا تھا کہ دھماکے سے مسجد کی چھت منہدم ہوگئی ، جس کے باعث یہ حادثہ پیش آیا ، واقعہ میں زخمی ہونے افراد کو طبی امداد کہ لئے اسپتال منتقل کردیا گیا ہیں۔

وزیر خارجہ مخدوم شاہ محمود قریشی نے افغانستان کی  مسجد میں نماز جمعہ کے دوران ہونیوالے بم دھماکوں پر گہرے دکھ اور افسوس کا اظہار کیا ہے۔

اس موقع پر وزیر خارجہ نے بم دھماکوں میں جاں بحق ہونیوالوں کے لئے دعائے مغفرت اور زخمیوں کی جلد صحت یابی کے لیئے دعا کی۔

مخدوم شاہ محمود قریشی کا کہنا تھا کہ دھماکوں کے نتیجے میں ہونیوالے جانی نقصان پر بہت افسوس ہے، مساجد امن کا گہوارہ ہیں مساجد پر حملہ انتہائی قابل مذمت ہے۔

واضح رہے کہ ایک ہفتے قبل شمالی افغان صوبے فریاب  میں  ایک دھماکہ ہوا  تھا جس میں 3 شہری ہلاک اور 3 زخمی ہو گئے تھے۔  صوبائی  انتظامیہ  کے مطابق یہ دھماکہ  ایک سڑک کنارے نصب بم پھٹنے سےہوا   جس میں  ایک  گاڑی  تباہ ہو گئی ۔

یاد رہے کہ دو ماہ قبل بھی افغانستان کے دارالحکومت کابل میں شادی کی تقریب میں دھماکہ ہوا تھا جس میں  63 افراد ہلاک ہوگئے تھے۔اس بم حملے میں 180 سے زیادہ افراد زخمی بھی ہوگئے تھے۔افغانستان کے صدر اشرف غنی نے اس بم حملے کی مذمت کرتے ہوئے اسے  وحشیانہ اقدام  قرار دیا  تھا اور طالبان پر دہشت گردوں کو مواقع فراہم کرنے کا الزام بھی عائد کیا۔