ترک صدر  رجب طیب اردوگان نے کہا ہے کہ شام میں کرد ملیشیا کے دہشتگردوں کے لیےکوئی جگہ نہیں ہے۔

غیر ملکی خبر رساں ادارے کے مطابق روس روانگی سےقبل صحافیوں سے گفتگو کرتے ہوئے ترک صدر رجب طیب اردوگان  نے کہا کہ کردوں نے سرحد سےمکمل انخلاء نہیں کیا تو ترکی شام میں دوبارہ کارروائی شروع  کرے گا ۔

رجب طیب اردوگان نے کہا کہ اگر امریکہ نے اپنے وعدے پورے نہ کیےتو ترکی شام میں وہیں سے آپریشن شروع کرےگاجہاں چھوڑا گیا ہے۔

ترک صدر  کا مزید کہنا تھا کہ دہشت گردی کے خلاف جنگ میں ترکی  اور  روس ایک ہی پیج پر ہیں۔روسی صدر سے ملاقات میں شمال مشرقی شام میں صورتحال کو معمول پر لانے پرگفتگو کی جائے گی۔

واضح رہے کہ 18 اکتوبر کو ترکی امریکہ کے ساتھ ایک معاہدے کے تحت شمالی شام میں کردوں کے خلاف فوجی کارروائی پانچ روز کے لیے بند  کرنے پر رضامند ہوگیا تھا۔

ترک صدر اردوگان سے ملاقات کے بعد امریکی نائب صدر مائیک پینس نے اعلان کیا تھا کہ ترکی پانچ روز تک جنگ بند رکھے گااس دوران کرد شہریوں کو شمالی شام سے محفوظ انخلا دیا جائے گا جس کے بعد ترکی کو علاقے کو بفر زون بنانے کا مکمل اختیار ہوگا۔

دوسری جانب ترکی  نےشام میں کارروائی کےنتیجے میں 775 دہشتگردوں کی ہلاکت کادعویٰ   بھی کیا ہے، جبکہ 7ترک  اور  79 شامی اہلکار  وں سمیت  20 شہری  بھی شہیدہوئے۔