یمن حکومت اور جنوبی عبوری کونسل نے ریاض سمجھوتے پر دستخط کردئیے ہیں۔

خبرایجنسی کے مطابق یمن کی عالمی طور پر تسلیم شدہ حکومت نے سعودی عرب کی مصالحت میں ملک کے جنوبی حصے میں سرگرم علیحدگی پسندوں کے ساتھ اختیارات کی تقسیم کا معاہدہ کر لیا ہے۔

ریاض معاہدے’ کا مقصد یمن میں خانہ جنگی کے دوران ہونے والے تصادم کا خاتمہ ہے۔

ریاض میں معاہدے پر دستخط کی تقریب میں سعودی عرب کے ولی عہد شہزادہ محمد بن سلمان نے بھی شرکت کی اور معاہدے کا اعلان کیا۔

شہزادہ محمد بن سلمان کا کہنا تھا کہ یہ سعودی عرب کے لیے خوشی کا موقع ہے کہ دونوں فریقین ایک دوسرے کے قریب ہو گئے ہیں جبکہ اس معاہدے سے یمن میں امن کے ایک نئے دور کا آغاز ہوگا۔

ترجمان کا کہنا تھا کہ معاہدے کے تحت علیحدگی پسندوں کی جنوبی عبوری کونسل (ایس ٹی سی) کو کئی وزارتیں دی جائیں گی۔

ترجمان کا مزید کہنا تھا کہ 7 روزمیں یمن کی قانونی حکومت کی جنوبی شہرعدن میں واپسی ہوگی جبکہ یمن حکومت میں شمالی اورجنوبی یمن کویکساں نمائندگی بھی دی جائےگی۔

اس موقع پراقوام متحدہ کے خصوصی نمائندہ برائے یمن مارٹِن گِرفتھ نے بھی فریقین کو معاہدے پر مبارکباد پیش کی۔

اقوام متحدہ کے خصوصی نمائندہ برائے یمن مارٹِن گِرفتھ نے کہا کہ معاہدے پر دستخط یمن میں تصادم کے پرامن حل کی طرف بڑھنے کے لیے ہماری مشترکہ کوششوں کا اہم حصہ ہےاور اس معاہدے سے یمن میں اس خانہ جنگی کے خاتمے میں مدد ملے گی۔