امریکا نے عراق میں ایران کی طرف سے کیے جانے والے میزائل حملوں میں 11 امریکی فوجیوں کے زخمی ہونے کا اعتراف کرلیا ہے۔

غیر ملکی خبر رساں ادارے  کے مطابق امریکا کی سینٹرل کمانڈ نے انکشاف کیا ہے کہ گزشتہ ہفتے ایران کی جانب سے  عراق میں امریکی فوجی اڈوں پر کیے گئے میزائل حملوں میں 11 امریکی فوجی زخمی ہوئے تھے  تاہم کوئی جانی نقصان نہیں ہوا تھا۔

فوجی حکام کا کہنا ہے کہ زخمی فوجیوں کو  علاج کے لیے کویت اور جرمنی کے اسپتالوں میں منتقل کیا گیا تھا۔

سینٹرل کمانڈ کے ترجمان نے بتایا کہ ایرانی حملے کے بعد کئی امریکی فوجیوں کو سر پر چوٹ کے شبے میں امداد دی گئی جن میں سے کئی فوجیوں کو اب بھی طبی امداد دی جارہی ہے۔

انہوں نے مزید کہا کہ حملے کے وقت ایئربیس پر موجود 1500 امریکی فوجیوں میں سے اکثر کو اعلیٰ حکام کی جانب سے حملے کی قبل از وقت اطلاع موصول ہونے پر ٹرکوں میں سوار کر کے بنکر میں پہنچا دیا گیا تھا۔

میزائل حملے امریکا کے منہ پر طمانچہ ہیں، ایرانی سپریم لیڈر

واضح رہے کہ امریکا نے اس سے قبل ایرانی حملوں میں کسی فوجی کے زخمی نہ ہونے کا بتایا تھا اور اس حوالے سے امریکی صدر ڈونلڈ ٹرمپ نے’سب اچھا ہے‘ کا ٹوئیٹ بھی کیا تھا۔

یاد رہے کہ 3 جنوری کو عراقی دارالحکومت بغداد میں امریکی ڈرون حملے میں ایرانی پاسداران انقلاب کی قدس فورس کے سربراہ جنرل قاسم سلیمانی کی ہلاکت کے بعد مشرق وسطیٰ کی صورت حال انتہائی کشیدہ ہو گئی تھی۔

جس کے جواب میں ایران نے 7 اور 8 جنوری کی درمیانی شب میں بھرپور جوابی حملہ کرتے ہوئے بغداد میں واقع امریکی ایئر بیس پر درجنوں بیلسٹک میزائل داغ دیے تھے۔

ایرانی حکام نے دعویٰ کیا تھا کہ امریکی فوجی اڈوں پر میزائل حملوں میں 80 فوجی ہلاک ہوئے ہیں تاہم امریکا نے اس دعوے کے تردید کرتے ہوئے کہا تھا کہ حملوں میں کوئی فوجی ہلاک یا زخمی نہیں ہوا۔