برطانوی ایئر لائن برٹش ایئر ویز نے چین سے آنے اور جانے والی تمام براہ راست پروازیں معطل کردی ہیں۔

غیر ملکی خبر رساں ادارے کے مطابق  عالمی سفر سے کورونا وائرس کے  پھیلنے کے اثرات کے بارے میں تشویش بڑھتی جارہی ہے  اسی بناء  پر  برٹش ایئر ویز نے  چین جانے اور وہاں سے آنے والی تمام براہ راست پروازیں معطل کردی ہیں ۔

برطانوی ایئر لائن کی ویب سائٹ پر جنوری   اور فروری  کی تاریخوں میں چین کے لئے براہ راست پروازیں  دستیاب نہیں ہیں تاہم ایئر لائن نے ایک ای میل میں کہا ہے کہ پروازوں کی منسوخی 31 جنوری تک نافذ العمل ہیں ۔

ایئر لائن کی جانب سے مزید کہا گیا کہ فروری  میں پروازیں منسوخ کرنے یا نہ کرنے کا فیصلہ بعد کی صورتحال کا جائزہ لینے کے بعد کیا جائے گا۔

برطانوی ایئر لائن  نے کہا کہ ہم تکلیف پر صارفین سے معذرت خواہ ہیں ، لیکن ہمارے صارفین اور عملے کی حفاظت ہمیشہ ہماری ترجیح  رہی ہے ۔

کورونا وائرس کا واحد علاج، دن میں پانچ باروضو

برٹش ایئر لائن کا یہ اقدام ایسے وقت میں سامنے آیا ہے جب ایک امریکی ایئر لائن نے بھی مسافروں کی کمی کے سبب کچھ پروازیں  منسوخ کردی ہیں۔

دوسری جانب برطانیہ کے دفتر خارجہ نے کورونا وائرس پھیلنے کی وجہ سے  اپنے شہریوں کو  ہدایت جاری کی ہے کہ چین کے غیر ضروری سفر سے گریز کیا جائے۔

واضح رہے کہ چین کے وسطی  شہر ووہان سے پھیلنے والے کورونا وائرس سے اب تک 132 افراد ہلاک جبکہ ہزاروں متاثر ہوچکے ہیں۔

کورونا وائرس کے سبب کئی ممالک نے اپنے شہریوں کو چین کا سفر کرنے سے گریز کرنے کا مشورہ دیا ہے۔

اس وباء کے مرکز   ووہان شہر سے سیکڑوں غیر ملکی شہریوں کو نکال لیا گیا ہے تاہم یہ مہلک وائرس اب تک چین  سمیت 16 دیگر ممالک میں  بھی پھیل چکاہے۔