برطانیہ میں کسٹم حکام نے گڑیا کے ذریعے ایک  ملین  ڈالر کی  کرسٹل  میتھ اسمگل کرنے کی کوشش ناکام بنادی۔

غیرملکی خبررساں ادارے کی رپورٹ کے مطابق ایسکس کے اسٹینسٹڈ ایئرپورٹ پر کسٹم حکام نے کارروائی کرتے ہوئے42 سالہ ماڈل پاؤلا موریش  اور اس کے  شوہر ڈیوڈ موریش کو گرفتار کرلیا۔

    ماڈل منشیات کو کافی کے بیگز اور میکسیکن ریسلر گڑیا میں چھپا کراسمگل کرنے کی کوشش کر رہی تھی۔

رپورٹ کے مطابق ایئرپورٹ پر سامان میں موجود گڑیا کی تلاشی لی گئی تھی اس کے خفیہ خانوں میں 7 کلو کرسٹل میتھ مفیتیمین یعنی اے کلاس منشیات چھپائی گئی تھی۔

رپورٹ کے مطابق اس جوڑے نے میکسیکن گینگ سے منشیات کی دوسری کھیپ وصول کی، جس میں کرسٹل میتھ بھی شامل ہے جو کافی کی طرح نظر آتی ہے اور کافی بین پیکٹوں میں بھیجا گیا تھا۔

پولیس کے مطابق جوڑے نے اپنے جرم کا اعتراف کرلیا، پاؤلا کو حراست میں   رکھا گیا ہے جبکہ اس کے شوہر ڈیوڈ کو ضمانت پر رہا کردیا گیا ہے۔