شامی فوج نے کہاہے کہ اس نے ملک کے شمال مغرب میں حلب شہر  پر مکمل قبضہ حاصل کرلیاہے۔

غیر ملکی خبر رساں ادارے کے مطابق شامی صدربشارالاسدنے  سرکاری ٹیلی ویژن پراپنے خطاب میں کہاکہ شامی فوج کی تیزی سے ہونے والی حالیہ فتوحات اس بات کی عکاس ہیں کہ نوسال سے جاری بدامنی کوبالآخرشکست ہوگی۔

ادھر  شامی فوج اور ملیشیا کی جانب سے شمالی شام کے حلب شہر پر دوبارہ کنٹرول حاصل کرنے کے چند گھنٹے بعد اقوام متحدہ نے خبردار کیا ہے کہ شمال مغربی شام میں محاذ آرائی خوفناک حد تک پہنچ گئی ہے۔

اقوام متحدہ کے انسانی حقوق کے امور کے اسسٹنٹ سیکرٹری جنرل مارک لوکوک نے ایک بیان میں کہا کہ یکم دسمبر سے اب تک شمال مشرقی شام میں جاری لڑائی کے نتیجے میں 9 لاکھ افراد بے گھر ہوچکے ہیں۔ان میں سے اکثریت خواتین اور بچوں کی ہے۔

اقوام متحدہ کے عہدیدار نے یہ بتایا کہ بے گھر ہونے والے افراد سخت سردی میں کھلے آسمان تلے زندگی گزارنے پرمجبور ہیں کیونکہ مہاجرین کے کیمپ انہیں رہائش فراہم نہیں کرسکے۔

 انہوں نے بتایا کہ مائیں اپنے بچوں کو گرمانے کے لیے پلاسٹک جلاتی ہیں جبکہ کئی نوزائیدہ اور کم سن بچے سردی سے مر جاتے ہیں۔

بین الاقوامی عہدے دار نے شمال مغربی شام میں ہونے والے تشدد کو اندھا دھندکارروائی قرار دیا اور تباہی کو روکنے کے لیے جنگ بندی کو واحد آپشن قرار دیا ہے۔

واضح رہے کہ گذشتہ ہفتے اقوام متحدہ کی طرف سے جاری ایک بیان میں نقل مکانی کرنے والے شامیوںکی تعداد 8 لاکھ بتائی تھی۔