سعودی حکومت نے کی جانب سے  مکہ مکرمہ میں  مسلمانوں کے دو مقدس مقامات  غار حرا اور غار ثور کی تزئین و آرائش کے احکامات جاری کر دیئے  گئے ہیں۔

 زائرین کی خدمت اور سہولت کے لیے دونوں علاقوں کے متعدد مقامات پر خوبصورت طرز کی تعمیرات بھی  کی جائیں گی ۔

غار حرا اور غار ثور  کی تزئین و آرائش  کی ہدایات  مکہ مکرمہ کے گورنر   شہزادہ خالد الفیصل کی جانب سے جاری ہوئیں ۔

سعودی خبررساں ادارے کے مطابق کورونا وائرس کے پھیلاؤ کو روکنے کے لیےلاک ڈاؤن اور کرفیو کے باعث غارحرا اور غار ثور پر زائرین کی آمد کا سلسلہ بندہے ۔

تزئین و آرائش کا کام  کئی مراحل پر مشتمل  ہو گا جس میں ابتدائی 30 دنوں میں  ان مقامات پر موجود پتھروں پر زائرین کی جانب سے کندہ تحریریں اور رنگوں کے ذریعے درج مختلف کلمات کی صفائی کی جائے گی۔

ساتھ ہی غاروں  کوجانے والے راستوں کی صفائی اور آرائش کا عمل بھی  انجام دیا جائےگا جبکہ لکڑی کے کھوکھے اور غیرقانونی دکانیں  بھی  ہٹا  دی جائیں گی۔

 زائرین کی سہولت کے لیے دونوں  مقامات  پر خوبصورت طرز کی تعمیرات  بھی منصوبے کا حصہ ہیں ۔

سن چھ سو دس عیسوی میں  نبی کریم حضرت محمد ﷺپر  غار حرا  میں پہلی وحی نازل ہوئی جبکہ غار ثور واقعہ ہجرت کی یاد دلاتا ہے ، جب نبی کریم ﷺ مدینے کی جانب ہجرت کرتے ہوئے  یہاں قیام پذیر ہوئے تھے ۔