ترجمان دفتر خارجہ نے کہا ہے کہ امریکہ طالبان امن معاہدہ ایک سنہری موقع ہے جس سے افغانستان کو فائدہ اٹھانا چاہیئے۔

تفصیلات کے مطابق ترجمان دفتر خارجہ نے بتایا ہے کہ افغانستان میں کانفرنس کا انعقاد کیا گیا ہے جس میں پاکستان نے بھی شرکت کی۔

کانفرنس میں پاکستان کی جانب سے خطے اور عالمی امن اور استحکام کے لیے پرامن اور مستحکم افغانستان کی اہمیت پر زور دیا گیا جبکہ پاکستان نے زور دیا کہ امریکہ طالبان امن معاہدہ ایک سنہری موقع ہے جس سے افگان قیادت کو فایدہ اٹھانا چاہیئے۔

کانفرنس میں پاکستانی قیادت کا کہنا تھا کہ افغان قیادت کو مل جل کر کام کرتے ہوئے ایک وسیع شمولیت پر مبنی سیاسی حل کا حصول یقینی بنانا چاہیئے۔

ڈاکٹر عائشہ فاروقی نے بتایا کہ پاکستان نے اس امید کا اظہار کیا کہ معاہدے کے مطابق قیدیوں کی رہائی سے جلد بین الافغان مذاکرات کے آغاز کی راہ ہموار ہو گی۔

ان کا مزید کہنا تھا کہ پاکستان نے زور دیا کہ جلد اور نتیجہ خیز بین الافغان مذاکرات کو یقینی بنانا عالمی برادری کی ضرورت ہے۔

ترجمان کا کہنا تھا کہ پاکستان کی جانب سے افغانستان کی تجارت کے فروغ کے لیے کوویڈ 19 احتیاطی تدابیر اختیار کرتے ہوئے سرحدی کراسنگ ٹرمینلز کھولنے کو بھی اجاگر کیا گیا۔

خیال رہے کہ پاکستان کی جانب سے افغانستان میں ویڈیو کانفرنس میں شرکت کی گئی، کانفرنس کاانعقاد “امن کے لیے اتفاق رائے کی مضبوطی” سے کیا گیا جبکہ افغانستان کی حکومت نے کانفرنس کی میزبانی کی۔

افغان صدر اشرف غنی اور افغانستان کی سپریم قومی مفاہمتی کونسل کے چئیرمین ڈاکٹر عبد اللہ عبداللہ نے بھی کانفرنس میں شرکت کی جبکہ کانفرنس میں متعدد ممالک اور تنظیموں کے نمائندوں نے شرکت کی۔