امریکی صدارتی امیدوار جوبائیڈن نے کہا ہے کہ صدر ٹرمپ حکومتی ناکامیوں سے توجہ ہٹانے کے لئے ڈاک کے ذریعے فراڈ ووٹنگ سے متعلق سفید جھوٹ بول رہے ہیں۔

تفصیلات کے مطابق امریکا کے ڈیموکریٹ صدارتی امیدوار جوبائیڈن نے کہا ہے کہ صدر ڈونلڈ ٹرمپ کورونا وائرس سے نمٹنے، وبا کے باعث کساد بازاری میں اضافے اور نسل پرستی اور تشدد کی روک تھام سے متعلق حکومتی نااہلی سے توجہ ہٹانا چاہتے ہیں جس کے لئے ٹرمپ ڈاک کے ذریعے فراڈ ووٹنگ اور غلط نتائج سے متعلق سفید جھوٹبول رہے ہیں۔

 امریکی صدارتی امیدوار نے کہا کہ یقین ہے کہ صدر ٹرمپ اپنے دور اقتدار میں انتخابی نتائج کو تسلیم نہ کرنے کے لیے وہ سب کچھ کریں گے, جو ان کے لیے اچھا ہو گا۔

جوبائیڈن نے یہ بھی کہا کہ صدر ٹرمپ کی انتخابات ملتوی کرنے کی تجویز صرف اور صرف جھوٹ پر مبنی ہے، ٹرمپ سیاسی مقاصد کے حصول کے لیے کورونا وبا کا غلط استعمال کرہے ہیں۔

امریکی صدارتی امیدوار جوبائیڈن نے مزید کہا کہ ڈاک کے ذریعے فراڈ ووٹنگ کا بہانہ بنا رہے ہیں ، ڈاک کے ذریعے کیسے فراڈ ووٹنگ ہو سکتی ہے اور یہ کیسے خوفناک ہو سکتی ہے۔

صدر ٹرمپ نے امریکی الیکشن کے التوا کی تجویز پیش کردی

یاد رہے کہ اس سے قبل امریکی صدر ڈونلڈ ٹرمپ نے امریکی صدارتی انتخابات میں تاخیر کی تجویز پیش کرتے ہوئے موقف دیا ہے کہ  عوام کے ووٹ محفوظ نہیں ہیں، فراڈ اور غلط نتائج آنے کا خدشہ ہے۔

صدر ٹرمپ نے ایک کے بعد ایک ٹوئٹ میں لکھا تھا کہ آئندہ نومبر میں صدارتی انتخاب ملتوی ہونے چاہییں کیونکہ اضافی  پوسٹل ووٹنگ کے طریقے میں فراڈ اور غلط نتائج کے خدشات زیادہ ہیں۔

صدر ٹرمپ نے مزید کہا تھا کہ عوام کے ووٹ کے محفوظ ہونے تک الیکشن کے انعقاد کو غیر ضروری قراردیا ہے۔

واضح رہے کہ امریکی ریاستیں اس سال انتخابات  میں کورونا وائرس کے لاک ڈاؤن کے پیش نظر ’’ووٹنگ اِن میل‘‘ کے طریقے کی حمایت  کررہیں ہیں۔