امریکی صدر جو بائیڈن نے چینی سرمایہ کاری سے مقابلے انفراسٹرکچر کی بحالی کیلئے منصوبے کا اعلان کردیا ہے۔

میڈیا رپورٹس کے مطابق امریکی صدر جوبائیڈن نے نیوزبریفنگ کے دوران معاشی انفراسٹرکچر کی تعمیر نو کیلئے 23 کھرب ڈالر کا منصوبہ پیش کردیا۔

 وائٹ ہاؤس کا کہنا ہے 23 کھرب ڈالر منصوبے سے بالکل نئی معیشت وجود میں آئے گی جو چین کو پیچھے چھوڑ دے گی۔

منصوبے کے تحت 32 ہزار کلو میٹر سڑکوں، معاشی اہمیت کے حامل 10 بڑے اور10 ہزار چھوٹے پلوں کی تعمیرِنو کی جائے گی۔

اس منصوبے کے تحت بجلی کے نظام، کمپیوٹر براڈ بینڈ اور ٹرانزٹ سسٹم کو بھرپور انداز سے اپ گریڈ کیا جائے گا جس سے ہزاروں ملازمتیں پیدا ہوں گی۔

خیال رہے کہ بائیڈن کے منصوبے کو ٹیکنالوجی اور عوامی سرمایہ کاری کے چینی منصوبوں کا جواب قرار دیا جارہا ہے۔