جرمن چانسلر اینگلا مرکل نے روس کو خبردار کیا ہے کہ مشرقی یوکرائن یا بیلاروس اور پولینڈ سرحد پر کشیدگی میں اضافے پر روس کو یورپی یونین کی جانب سے مزید پابندیوں کا سامنا کرنا ہوگا۔

جرمن چانسلر نے یورپی یونین سے بھی کہا کہ روس کے خلاف مزید پابندیاں عائد کرنے کے لیے تیار رہنا ہوگا۔

برلن میں پولش وزیراعظم ماٹیوس موراویسکی کے ہمراہ ایک پریس کانفرنس میں اینگلا مرکل کا کہنا تھا کہ بیلاروس کی جانب سے مہاجرین کو ہتھیار کے طور پر استعمال کرنے پر یورپی یونین کو ایک متحد اور مضبوط ردعمل کا مظاہرہ کرنا چاہیے۔

جرمن چانسلر اینگلا مرکل نے یوکرائن کے مشرقی حصے کے قریب روسی فوج کی تعیناتی پر شدید تشویش بھی ظاہر کی۔ چانسلر آفس کے مطابق مرکل نے اسی تناظر میں یوکرائنی صدر سے بھی ٹیلی فون پر بات چیت کی ہے۔