مقبوضہ کشمیر میں قابض بھارتی فورسز نے سرچ آپریشن کی آڑ میں ایک اور نوجوان کو شہید کردیا ہے۔

کشمیر میڈیا سروس کے مطابق مقبوضہ وادی کے ضلع کلگام میں اشموجی میں قابض بھارتی فوج نے سرچ آپریشن کے نام پر محاصرہ کررکھا ہے، اس دوران قابض بھارتی فوج نے فائرنگ کرکے ایک شہری کو شہید کردیا ہے۔

دوسری جانب کشمیر میڈیا سروس نے بچوں کے عالمی دن کے حوالے سے ایک رپورٹ بھی جاری کی ہے، جس میں بتایا گیا ہے کہ 1989 سے اب تک مقبوضہ وادی میں 95 ہزار 897 لوگ شہید کئے جاچکے ہیں، جن میں 909 بچے بھی شامل ہیں۔ بھارتی فوج کے ہاتھوں اس نسل کشی کے باعث مقبوضہ کشمیر کے ایک لاکھ 7 ہزار 854 بچے یتیم ہوئے ہیں۔

کشمیر میڈیا سروس کی رپورٹ کے مطابق 2019 کو بھارتی آئین میں مقبوضہ کشمیر کی خصوصی حیثیت ختم کئے جانے کے بعد کئے گئے پر امن مظاہروں کو روکنے کے لیے بھارتی فوج نے پیلٹ گن کا بے دریغ استعمال کیا، جس سے بڑی تعداد میں بچے معذوری کا شکار ہوئے۔ اس کے علاوہ بڑی تعداد میں بچے بھارتی فوج کی حراست میں بھی ہیں۔