اسرائیلی وزیراعظم نفٹالی بینیٹ نے ایران سے ایٹمی معاہدے کی بحالی کی مذمت کرتے ہوئے ایران سے کشیدگی میں اضافے کا انتباہ دے دیا۔ اُن کا کہنا تھا کہ اسرائیل ایران کے عالمی طاقتوں سے ہونے والے کسی نیوکلیئر معاہدے کا پابند نہیں ہے۔

رواں سال جون میں عہدہ سنبھالنے والے اسرائیلی وزیراعظم نفٹالی بینیٹ نے ایک تقریر میں ایران کو اپنے نیوکلیئر پروگرام کی ایڈوانس اسٹیج میں قرار دیا ہے۔

ایرانی ایٹمی پروگرام کے خلاف سخت ترین لہجہ اختیار کرنے والے اسرائیلی وزیراعظم نفٹالی بینیٹ نے ایک ورچوئل کانفرنس میں کہا کہ ہم پیچیدہ صورتحال کا سامنا کر رہے ہیں جس میں یہ بھی ممکن ہے کہ ہمارا اپنے بہترین دوستوں سے تنازع ہو جائے۔ تاہم کسی بھی صورت میں اسرائیل کسی معاہدے کا نہ تو فریق بنے گا اور نہ ہی پابند ہوگا۔

اسرائیلی وزیراعظم نے الزام عائد کیا کہ اپنے گھر میں چین سے بیٹھنے والے ایران نے اسرائیلی ریاست کومیزائلوں کے محاصرے میں لے رکھا ہے۔ وزیراعظم بینیٹ نے ایران کو سوچ سے زیادہ خطرناک قرار دیا ہے۔