نئی دہلی میں آلودگی کی بدتر صورتحال کے سبب بچوں میں سانس کےلینے کے مسائل بڑھ رہے ہیں۔

خراب صورتحال سے نمٹنے کےلیے نئی دہلی میں حکومت نے پانچ پاور اسٹیشنز بند کردیے جبکہ اسکولوں کی چھٹیوں میں اضافہ کردیا گیا۔

آئی کیو ایئر کے مطابق دو کروڑ آبادی والے شہیر نئی دہلی کو 2020 میں لگاتار تیسری بار دنیا کے آلودہ ترین دارالحکومت قرار دیا گیا تھا۔

صاف مطلع کے باوجود اسموگ کے سبب سورج بمشکل دیکھا جارہا ہے اور حدِ نگاہ چند سو میٹر تک ہی محدود ہوگیا ہے۔

اسپتالوں میں بچوں میں سانس کی بیماریوں میں تیزی سے اضافہ دیکھا جارہا ہے جو والدین اور ڈاکٹرز کےلیے فکر کا باعث بن رہا ہے۔

ایک اسپتال کے سربراہ اروند بونٹرا کے مطابق گزشتہ سات سے 10 دنوں تعداد تین گُنا بڑھ گئی ہے۔

ان کا کہنا تھا کہ اس کا براہ راست تعلق دہلی اور اس کے نواحی علاقوں میں خطرناک حد تک بڑھ جانے والی آلودگی سے ہے۔

آلودگی میں لیڈ(سیسہ) جیسے مادوں کا سامنا مزید پیچیدگیوں کا سبب بن سکتا ہے۔

بونٹرا نے مزید کہا ’ایک تحقیق بتاتی ہے کہ یہ باریک ذرات (بچوں میں) دماغ کے کوگنیٹِو فنکشن کو بھی متاثر کرتے ہیں۔‘

وفاقی آلودگی کنٹرول بورڈ کے مطابق زیادہ تر دنوں میں ایئر کوالیٹی انڈیکس 500 کے اسکیل پر 451 سے اوپر رہا ہے جو نہایت خراب صورتحال کی جانب اشارہ کرتا ہے۔ یہ صورتحال صحت مند انسان افراد کو بھی متاثر کرتی ہے اور وہ لوگ جو پہلے سے بیمار ہیں ان پر خطرناک اثر ڈالتی ہے۔

بھارت کی سپریم کورٹ نے شہریوں کو آلودگی سے پاک ماحول دینے میں ناکامی پر حکومت کی سرزنش کی تھی۔

سپریم کورٹ نے ایئر کوالیٹی مینجمنٹ کمیشن کو آلودگی ختم کرنے کےلیے اقدامات کرنے کا کہا تھا۔