ترکی کی کرنسی لیرا ڈالر کے مقابلے میں 8 فیصد کم ہوکر 12.49 کی ریکارڈ کم ترین سطح پر آگئی۔

برطانوی نیوز ایجنسی روئٹرز کے مطابق ترکی کی غیر روایتی مالیاتی پالیسی کے بارے میں تشویش کی وجہ سے منگل کو لیرا ڈالر کے مقابلے میں ریکارڈ کم ترین سطح پر آگیا۔

ترک صدر طیب اردوان جو طویل عرصے سے اقتصادی ترقی کو تیز کرنے کی کوشش کر رہے تھے، نے پیر کو مالیاتی پالیسی کی کم شرح کا دفاع کرتے ہوئے اپنی ’آزادی کی معاشی جنگ‘ میں کامیاب ہونے کے عزم کا اظہار کیا تھا۔

ترکی میں پالیسی ریٹ اب 15 فیصد ہے جبکہ افراط زر 20 فیصد ہے۔ لیرا اب ڈالر کے مقابلے میں 37 فیصد سے زیادہ نیچے ہے جو کہ ابھرتی ہوئی مارکیٹ کے دیگر فریقوں سے نمایاں طور پر پیچھے ہے۔

اِن خدشات میں بھی اضافہ ہو رہا ہے کہ صدر اردوان جلد ہی وزیر خزانہ اور اقتصادیات لطفی ایلوان کو عہدے سے ہٹا سکتے ہیں۔