فرانس کی جانب سے گزشتہ رات نافذ العمل ہونیوالی سفری پابندی سے قبل برطانوی عوام نے فرانس جانے والی یورو اسٹار ٹرین پر ہلا بول دیا۔

برطانیہ میں ریکارڈ تعداد میں مسافروں نے فرانس جانے کے لیے لندن کے پینکراس اسٹیشن کا رُخ کیا۔

واضح رہے کہ فرانس نے اومیکرون ویریئنٹ کے پھیلاؤ کو روکنے کے لیے جمعرات کے روز جن سفری پابندیوں کا اعلان کیا تھا اُن میں یہ بھی شامل تھا کہ مسافروں کو برطانیہ اور فرانس کے درمیان سفر کے لیے ’’انتہائی ضروری وجہ‘‘ بھی درکار ہوگی۔ غیر ضروری سفر کرنے والوں کو اجازت نہیں دی جائے گی۔

اِس پابندی سے استثنیٰ صرف اُن فرانسیسی اور یورپی مسافروں کو حاصل ہوگا جو فرانس میں اپنے گھر لوٹ رہے ہوں یا پھر اُن برطانوی مسافروں کو جو فرانس کے علاوہ کہیں اور کا سفر کر رہے ہوں۔

پابندی کے نافذ العمل ہونے سے قبل آخری دن یورو اسٹار ٹرینوں کے ٹکٹ حاصل کرنے والے مسافروں نے جہاں خود کو خوش نصیب قرار دیا وہاں اِس پابندی کو نامعقول بھی کہہ ڈالا۔

فرانس جانے والی ایک مسافر خاتون کا کہنا تھا کہ والدین کے ساتھ تعطیلات گزارنے کے لیے اُنہیں اتوار کے روز فرانس روانہ ہونا تھا مگر اِس پابندی کی وجہ سے اُنہیں اپنا ٹکٹ تبدیل کرانا پڑا جس کے لیے اُنہوں نے 70 پاؤنڈ اضافی خرچ کیے جبکہ چوبیس گھنٹوں کے اندر کرائے گئے پی سی آر ٹیسٹ کی منفی رپورٹ دکھانے کی پابندی کے باعث اُنہیں 30 پاؤنڈ اضافی خرچ کرنا پڑے۔

برطانیہ سے فرانس جانے والے مسافروں کو سات روزہ قرنطینہ بھی اختیار کرنا ہوگا جو پی سی آر ٹیسٹ کی رپورٹ منفی آنے کی صورت میں صرف دو دن کا ہوگا۔