روس نے ایک درجن کے قریب ’زرکون‘ نامی ہائپر سونک کروز میزائلوں کا تجربہ کیا ہے۔

روسی نیوز ایجنسی انٹرفیکس کے مطابق دس زرکون ہائپر سونک کروز میزائل فریگیٹ اور دیگر دو میزائل آبدوز سے فائر کیے گئے۔

 روسی صدر ولادیمیر پیوٹن نے اس تجربے کو ملک کے لیے ایک بڑا قدم قرار دیا ہے۔ صدر پیوٹن کا کہنا ہے کہ گزشتہ ہفتے کیے گئے زرکون ہائپر سونک کروز میزائل تجربے روسی دفاعی صلاحیتوں میں ایک اہم اضافہ ہیں۔

صدر پیوٹن نے یہ دعویٰ بھی کیا کہ نئی جنریشن کے اِن ہائپر سونک کروز میزائلوں کا کوئی مقابل نہیں ہے۔

روسی صدر پیوٹن نے 2018 میں ہائپر سونک ہتھیاروں کی تیاری کا اعلان کرتے ہوئے کہا تھا کہ یہ دنیا کے کسی بھی مقام کو نشانہ بنا سکتے ہیں اور امریکا کے میزائل ڈیفنس سسٹم سے بچ بھی سکتے ہیں۔

مغربی دفاعی مبصرین نے اِن ہائپر سونک کروز میزائلوں کی جدت پر سوال اٹھاتے ہوئے یہ بھی تسلیم کیا ہے کہ رفتار، کنٹرول اور بلندی کی اعلیٰ صلاحیتوں کے حامل ہائپر سونک کروز میزائلوں کو تلاش کر پانا اور تباہ کرنا کافی مشکل ہے۔

واضح رہے کہ گزشتہ شب ہی امریکی صدر بائیڈن اور روسی صدر پیوٹن کے درمیان یوکرائن کے تنازع پر دھمکیوں کا تبادلہ بھی ہوا ہے۔