ترکی کے صدر رجب طیب اردوان نے کہا ہے کہ ملک میں تیار کی گئی کورونا ویکسین ’’ترکو ویک‘‘ کے فوری استعمال کی منظوری لے لی گئی ہے۔

صدر اردوان نے ترکو ویک ویکسین کے فوری استعمال کے اجازت نامے اور وسیع پیداوار کے آغاز کی تقریب میں بذریعہ وڈیو کانفرنس شرکت کی۔

وڈیو کانفرنس میں صدر اردوان نے بتایا کہ مقامی ویکسین ترکو ویک ضروری منظوریوں کے بعد استعمال کے مرحلے میں داخل ہوگئی ہے۔ یہ ویکسین ہماری اُن کوششوں کی علامت ہے جو ہم اپنی ملت کو وباؤں سے مؤثر ترین صورت میں بچانے کے لیے کر رہے ہیں۔ ترکو ویک کی وسیع پیمانے پر پیداوار شروع ہونے کے بعد ویکسین کو تمام انسانیت کے ساتھ بانٹنا ہمارے لیے باعثِ مسرت ہوگا۔

ترک صدر نے کہا کہ ویکسین کو اپنے ملک میں تیار کرنا نہایت اہمیت کا حامل ہے اور ویکسین کا ملکی سائنسدانوں اور محققین کی طرف سے تیار کیا جانا اور بھی بامعنی ہے۔ اس طرح ہم اپنے شہریوں کو انتخاب کے لئے سینوویک اور بائیونٹیک کے ساتھ ساتھ ترکو ویک بھی پیش کرسکیں گے۔