امریکی ایوانِ نمائندگان کی مسلمان ڈیموکریٹ رکن الہان عمر اکثر و بیشتر دائیں بازو کے سیاست دانوں یہاں تک کہ سابق صدر ڈونلڈ ٹرمپ کی تنقید کا بھی نشانہ بنتی رہی ہیں۔

14 دسمبر کو جس وقت الہان عمر کے اسلامو فوبیا کے خلاف پیش کیے گئے ایک بل پر بحث ہو رہی تھی تو رپبلکن پارٹی کے رکنِ کانگریس اسکاٹ پیری نے دعویٰ کیا کہ الہان عمر کا تعلق ایک دہشتگرد تنظیم سے ہے اور امریکی عوام کا پیسہ اُن دہشتگرد تنظیموں کو نہیں جانا چاہیے جن کا تعلق اس بل کو لانے والے سے ہے۔

بعد میں کانگریس نے الہان عمر کا پیش کردہ یہ بل منظور کرلیا جس کے حق میں تمام ڈیموکریٹس اور مخالفت میں تمام رپبلکنز نے ووٹ دیا۔ اسکاٹ پیری کے الفاظ کو ایوان کی کارروائی سے حذف کر دیا گیا۔

الہان عمر کے اس بل کا نام ’’بین الاقوامی اسلاموفوبیا کا مقابلہ‘‘ ہے جس کا مقصد ہے کہ امریکی صدر محکمہ خارجہ کے تحت ایک خصوصی نمائندہ مقرر کریں جو دنیا بھر میں اسلاموفوبیا کے واقعات کو رپورٹ کرے۔ ایسا ہی ایک نمائندہ امریکی محکمہ خارجہ میں پہلے سے تعینات ہے جس کا کام عالمی سطح پر یہود مخالف واقعات کو رپورٹ کرنا ہے۔

ویسے تو یہ بل گزشتہ کئی مہینوں سے ایوانِ نمائندگان کی اُمورِ خارجہ کمیٹی میں موجود تھا مگر گذشتہ چند دنوں کے واقعات نے اس بل میں نئی روح پھونک دی جس کے بعد اسے منظور کرلیا گیا۔

گزشتہ ماہ رپبلکن نمائندہ لورین بوبرٹ کی ایک وڈیو سامنے آئی تھی جس میں اُنہوں نے الہان عمر کو ’’جہاد اسکواڈ‘‘ کا حصہ کہہ کر دہشت گرد قرار دیا تھا۔ اس کے کچھ دن بعد ایک اور رپبلکن نمائندہ مارجوری ٹیلر گرین نے بھی الہان عمر کو ’’جہادی‘‘ قرار دیا تھا۔

الہان عمر نے ٹوئٹر پر کہا کہ ایوانِ نمائندگان میں اس بل کی منظوری دنیا بھر میں مسلمانوں کے لیے ایک بہت بڑا سنگِ میل ہے اور ایک مضبوط اشارہ ہے کہ اسلاموفوبیا کو کہیں بھی برداشت نہیں کیا جا سکتا۔

https://twitter.com/IlhanMN/status/1470982083061420036?s=20

وائٹ ہاؤس نے بھی اس بل کی حمایت کی ہے اور کہا ہے کہ آزادی مذہب بنیادی انسانی حق ہے۔ مگر ڈیموکریٹ صدر جو بائیڈن تک پہنچنے سے پہلے بل کو سینیٹ سے منظوری درکار ہوگی جہاں 100 نشستوں میں سے 50 رپبلکنز، 48 ڈیموکریٹس اور 2 آزاد اُمیدواروں کے پاس ہیں۔

ڈیموکریٹ رکن الہان عمر کا تعلق صومالیہ سے ہے۔ اُنہیں اور اُن کی ساتھی ڈیموکریٹ رکن راشدہ طلیب کو فلسطینی ریاست کے قیام اور فلسطینی عوام کے حق میں بات کرنے پر دائیں بازو کے سیاستدانوں اور مبصرین کی جانب سے تنقید کا نشانہ بنایا جاتا رہا ہے۔