متحدہ عرب امارات کی ایئر ڈیفنس نے حوثی باغیوں کی جانب سے دو میزئل حملوں کو ناکام بنانے کا دعوہ کیا ہے۔

غیر ملکی خبر رساں ادارے کے مطابق متحدہ عرب امارات کی وزارت دفاع کا کہنا ہے کہ حوثی باغیوں کی جانب سے ملک پر داغے گئے دو میزائلوں کو ناکام بنادیا گیا ہے۔

رپورٹ کے مطابق میزائلوں کو ابوظہبی میں تباہ کیا گیا ہے جس کے تباہ ہونے کے بعد کسی شہری کے زخمی ہونے یا نقصان کی اطلاع موصول نہیں ہوئی ہے۔

وزارت دفاع کا اپنے بیان میں کہنا تھا کہ ہم ہرطرح سے اپنے ملک کے دفاع کے لیے تیار ہیں اور ریاست کو ہر طرح کے حملوں سے بچانے کے لیے ضرروی اقدامات کیے جارہے ہیں۔

واضح رہے کہ گذشتہ دنوں حوثی باغیوں نے ابوظہبی میں مختلف تنصیبات کو ممکنہ طور پر نشانہ بنایا تھا جس کے نتیجے میں 3 افراد جاں بحق ہوگئے تھے۔

اس حوالے سے حوثی باغیوں کے ترجمان نے یہ دعوی کیا تھا کہ انہوں نے متحدہ عرب امارات کے اندر فوجی آپریشن کیا ہے جبکہ اس حوالے سے انہوں نے تنصیبات ظاہر نہیں کی تھیں۔

دوسری جانب گذشتہ دنوں امریکا نے حوثی باغیوں کو دوبارہ دہشگرد قرار دینے پر غور شروع کردیا ہے جبکہ اس حوالے سے امریکی صدر کا کہنا تھا کہ وہ دوبارہ حوثی باغیوں کو دہشت گرد قرار دینے پر سوچ بچار کررہے ہیں۔

یاد رہے کہ صدر جو بائیڈن نے صدارتی منصب سنبھالنے کے بعد حوثیوں کو عالمی دہشت گردوں کی فہرست سے خارج کر دیا تھا جبکہ ان کی حکومت امن مذاکرات شروع کرنے اور یمن میں آٹھ سالہ طویل جنگ کو ختم کرنے میں کامیاب نہیں ہوسکی ہے۔