ملائیشیا کے سابق وزیراعظم مہاتیر محمد کو عارضہء قلب کے باعث اسپتال میں داخل کیا گیا ہے۔

عالمی خبر رساں ادارے اے ایف پی کے مطابق جدید ملائیشیا کے بانی اور سابق وزیراعظم مہاتیر محمد کو دل میں تکلیف کے باعث دارالحکومت کوالالمپور میں قومی ادارہ برائے امراض قلب کے اسپتال منتقل کیا گیا ہے جہاں ان کی حالت تشویشناک بتائی جا رہی ہے۔

96 سال کی عمر میں قابل رشک صحت کے حامل رہنما مہاتیر محمد کی علالت کی خبر سن کر ان کے حامیوں اور پرستاروں کی ایک کثیر تعداد اسپتال کے باہر جمع ہو گئی۔

قومی ادارہ برائے امراضِ قلب کے ترجمان کا کہنا ہے کہ سابق وزیراعظم کو سینے میں شدید تکلیف کی شکایت پر اسپتال منتقل کیا گیا ہے اور معالجین ان کی بہتری کے لیے سر توڑ کوششوں میں مصروفِ عمل ہیں۔

اپنے سیاسی کیریئر میں 24 سال تک مختلف عہدوں پر خدمات انجام دینے والے سابق وزیراعظم مہاتیر محمد کی میڈیا ٹیم اور اسپتال انتظامیہ نے اُن کی طبیعت کے بارے میں تاحال میڈیا کو مکمل معلومات فراہم نہیں کی ہیں۔