بالی وڈ کے فلمساز سنیل درشن نے گوگل کے بھارتی سی ای او سندر پچائی کے خلاف ممبئی پولیس میں شکایت درج کرائی ہے۔

شکایت میں کہا گیا ہے کہ انہوں نے 2017ء میں بنائی گئی اپنی فلم ’’ایک حسینہ تھی ایک دیوانہ تھا‘‘ کے حقوق کسی کو فروخت نہیں کیے تھے لیکن یہ فلم یوٹیوب پر دکھائی جارہی ہے اور اب تک لاکھوں افراد اسے دیکھ چکے ہیں۔

 سنیل درشن نے دعویٰ کیا کہ ان کی فلم کو بڑی بے شرمی سے غیر قانونی طور پر اپ لوڈ کرکے بڑی کمائی کی جا رہی ہے۔

سنیل درشن نے میڈیا سے بات کرتے ہوئے کہا کہ وہ اس خلاف ورزی کے لیے سندر پچائی کو مورد الزام ٹہراتے ہیں کیونکہ وہی گوگل کی نمائندگی کرتے ہیں۔ فلم کو ایک ارب سے زیادہ مرتبہ دیکھا گیا ہے، کمپنی سے اس حوالے سے شکایت کی تھی لیکن انہوں نے کوئی توجہ نہیں دی۔

 بالی وڈ فلمساز سنیل درشن نے سندر پچائی کے علاوہ یو ٹیوب کے سربراہ گوتم آنند، گریوانس افسر جوئے گرائر اور گوگل کے چار دیگر عہدیداروں کو بھی فریق بنایا ہے۔

فلم ’’ایک حسینہ تھی ایک دیوانہ تھا‘‘ کو سنیل درشن نے لکھا تھا اور ہدایات بھی دی تھیں اور وہی اس فلم کے پروڈیوسر بھی ہیں۔ فلم میں شیو درشن، نتاشا فرنانڈیز اور اوپین پٹیل نے اہم کردار ادا کیے تھے۔

Filmmaker Suneel Darshan files FIR against Sundar Pichai, Google for copyright infringement – Movies News https://www.bolnews.com/urdu/world/2022/01/349646/amp/

— Suneel Darshan (@SuneelDarshan1) January 26, 2022

خیال رہے کہ سندر پچائی کو بھارتی یوم جمہوریہ کے موقع پر مودی حکومت نے تیسرا سب سے بڑا سویلین ایوارڈ پدم بھوشن دینے کا اعلان کیا ہے۔

بھارت میں گوگل کے ترجمان نے اپنے ایک بیان میں کہا ہے کہ کمپنی کاپی رائٹ مالکان پر اس بات کے لیے انحصار کرتی ہے کہ وہ کسی غیر قانونی اپ لوڈ کے حوالے سے اُنہیں مطلع کریں۔

گوگل ترجمان کے مطابق وہ اس کے لیے اُنہیں مینجمنٹ ٹولز مثلاً یو ٹیوب کنٹینٹ آئی ڈی سسٹم تک رسائی دیتے ہیں جس سے کاپی رائٹ حقوق رکھنے والے اپنے مواد کی شناخت کرکے اسے بلاک یا پروموٹ کرسکتے ہیں، حتیٰ کہ وہ اپنے مواد سے پیسے بھی کما سکتے ہیں۔

گوگل کے ترجمان کا مزید کہنا تھا کہ جب ہمیں کاپی رائٹ کی خلاف ورزی کا پتا چلتا ہے تو ہم قانون کے مطابق اس مواد کو فوراً ہٹا دیتے ہیں۔

سنیل درشن نے اپنے بیان میں کہا ہے کہ اُنہوں نے سندر پچائی کے خلاف کیس شہرت کے لیے نہیں، حقائق کو سامنے لانے کے لیے کیا ہے اور وہ چاہتے ہیں کہ کسی کے جائز حقوق کی خلاف ورزی نہ ہو۔

سنیل درشن انتقام، جانور، ایک رشتہ، انداز اور برسات سمیت متعدد فلموں کے پروڈیوسر ہیں۔