بھارتی ریاست بہار سے تعلق رکھنے والے ایک شہری برہما دیو منڈل جس نے گھٹنوں کے پرانے درد میں کمی محسوس ہونے پر ایک کے بعد ایک کورونا ویکسین کی 12 خوراکیں لگوا ڈالی تھیں، اب پولیس کے خوف سے مفرور ہے۔

گزشتہ برس فروری میں جب برہما نے کورونا وائرس کی پہلی ڈوز لگوائی تو اُنہیں محسوس ہوا کہ ان کے گھٹنوں کے برسوں پرانے درد میں افاقہ ہوا ہے۔

ریٹائرڈ کلرک برہما دیو نے جب دوسری خوراک لگوائی تو پھر اُنہیں لگا کہ اب چھڑی کے سہارے کی ضرورت بھی نہیں رہی۔ بس پھر کیا تھا، برہما جی نے تہیہ کرلیا کہ وہ ہر ماہ کورونا ویکسین کی ایک ڈوز لگوائیں گے۔

برہما دیو منڈل نے نجانے کیسے سسٹم کو دھوکا دے کر ایک کے بعد ایک کورونا ویکسین کی 12 خوراکیں لگوا ڈالیں مگر آخرکار پکڑے ہی گئے اور ان کے خلاف ویکسینیشن نظام کے غلط استعمال کا مقدمہ بھی درج ہوگیا۔

میڈیا پر اُن کے کارنامے کا چرچا ہوا تو محکمہ صحت حکام اور پولیس بھی حرکت میں آئے۔ برہما دیو منڈل کے گھر پر پولیس  نے چھاپا مارا تو وہ پہلے ہی نو دو گیارہ ہو چکے تھے۔ برہما دیو پر دھوکے بازی سمیت کئی دفعات کے تحت مقدمہ درج کیا گیا ہے تاہم ان کا کہنا تھا کہ موقع ملا تو وہ کورونا ویکسین کی مزید خوراکیں بھی لگوائیں گے۔

ڈاکٹروں کا کہنا ہے کہ یہ آدمی خوش قسمت ہے کہ اسے کوئی سائڈ افیکٹ نہیں ہوا۔ اُسے گردوں، دل کی بیماری یا نمونیہ ہو سکتا ہے، برہما دیو کو چیک کرنا چاہیے۔ برہما دیو کا یہ سمجھنا کہ ویکسین سے ان کے جوڑوں کا درد ٹھیک ہوا محض نفسیاتی تاثر ہے، اگر اوور ڈوز ہو جائیں تو اچانک موت بھی واقع ہو سکتی ہے۔

بھارت میں ویکسین لگوانے کے لیے ’’کو ون‘‘ نامی پلیٹ فارم پر رجسٹریشن کرائی جاتی ہے جس کے بعد بتایا جاتا ہے کہ کس ویکسینیشن سینٹر جائیں لیکن جس دیہی علاقے میں برہما دیو رہتے ہیں وہاں سے سسٹم میں ڈیٹا کی ترسیل دیر سے ہوتی ہے۔

ضلعی چیف میڈیکل آفیسر ڈاکٹر عبدالسلام کے مطابق برہما دیو نے اسی کمزوری کا فائدہ اٹھایا، اب ہم نظام کو بہتر کرنے کی کوشش کر رہے ہیں۔

گزشتہ برس ستمبر میں بھارتی وزیراعظم نریندر مودی کی سالگرہ پر متعدد ریاستوں کے درمیان زیادہ سے زیادہ افراد کو کورونا ویکسین لگانے کا مقابلہ ہوا جس میں ریاست بہار ملک بھر میں لگنے والی ڈھائی کروڑ کورونا ویکسین میں سے 34 لاکھ خوراکیں لگا کر پہلی پوزیشن پر آئی تھی۔