عرب عسکری اتحاد کی جانب سے یمن کی جیل پر کیے گئے فضائی حملے سے لاتعلقی کا اظہار کیا گیا ہے۔

شمال مغربی یمن میں واقع حوثی باغیوں کے گڑھ صعدہ کی جیل پہ کیے گئے حملے کی ذمہ داری سعودی عسکری اتحاد پر عائد کی گئی ہے تاہم سعودی حکومت کا کہنا ہے کہ اس کارروائی میں عرب عسکری اتحاد کا کوئی کردار نہیں ہے۔

عرب عسکری اتحاد کی طرف سے بھی ایک بیان جاری کیا گیا ہے جس میں کہا گیا ہے کہ یہ جیل اس کی ٹارگٹ لسٹ میں ہی شامل نہیں تھی۔

یمن میں حکومت کی رِٹ بحال کرنے کے لیے قائم عرب عسکری اتحاد کی افواج نے حراستی مرکز کو نشانہ بنانے کی خبروں کی تردید کرتے ہوئے ایسی میڈیا رپورٹس کو جھوٹ قرار دیا ہے۔

عرب نیوز کے مطابق عرب عسکری اتحاد نے کہا ہے کہ اس طرح کی غلط خبریں ایرانی حمایت یافتہ حوثی ملیشیا پھیلاتی ہے جو دنیا کو دھوکا دینے کے ایجنڈے کا حصہ ہے۔

حوثی باغیوں کے وزیر صحت طہٰ المتوکل نے کہا تھا کہ بمباری کے نتیجے میں جیل میں موجود 70 افراد ہلاک ہوچکے ہیں جبکہ درجنوں زخمیوں میں سے کئی کی حالت تشویشناک ہے جس کی وجہ سے ہلاکتوں میں اضافے کا خدشہ ہے۔

اقوام متحدہ نے بھی یمن کی جیل پر ہوئے فضائی حملے کی شدید الفاظ میں مذمت کی ہے۔

اقوام متحدہ کے سیکرٹری جنرل انتونیو گوتریس نے اپنے بیان میں کہا ہے کہ ہم تمام فریقین کو یہ یاد دلاتے ہیں بے گناہ شہریوں اور شہری تنصیبات پر حملے بین الاقوامی انسانی قانون کی سنگین خلاف ورزی میں شمار ہوتے ہیں۔