امریکا کی تاریخ میں پہلی بار ایک مُسلم جنوبی ایشیائی خاتون کو بطور وفاقی جج نامزد کیا گیا ہے۔

صدر جو بائیڈن کی طرف سے نامزد کردہ نصرت جہاں مجموعی طور پر ان آٹھ امریکی ماہرین قانون میں سے ایک ہیں جن کے نام وفاقی ججوں کے طور پر تعیناتی سے پہلے توثیق کے لیے امریکی سینیٹ کو بھیجے گئے ہیں۔

نصرت جہاں چوہدری کے بارے میں امریکی سینیٹ کو یہ تجویز بھیجی گئی ہے کہ انہیں نیو یارک فیڈرل کورٹ کے ایسٹرن ڈسٹرکٹ کی عدالت کا جج تعینات کیا جائے۔

پیدائشی طور پر بنگلہ دیش سے تعلق رکھنے والی 44 سالہ نصرت جہاں چوہدری شہری حقوق کے تحفظ کی سب سے بڑی امریکی تنظیم امریکن سول لبرٹیز یونین سے وابستہ ہیں اور الینوئے میں اس تنظیم کے قانونی امور کی ڈائریکٹر ہیں۔

Pres. Biden announced the nomination of Nusrat Jahan Choudhury to the federal judiciary Wednesday, who, if confirmed by the Senate, would become the first Muslim American woman to serve as a federal judge. https://www.bolnews.com/urdu/world/2022/01/402032/amp/

— ABC News (@ABC) January 21, 2022

الینوئے میں اے سی ایل یو کے لیے اپنے فرائض کی انجام دہی کے دوران دیگر امور کے علاوہ نصرت چوہدری نے قانونی ماہرین کی اس ٹیم کی سربراہی بھی کی جس کا کام شکاگو میں پولیس کی کارکردگی بہتر بنانے کے لیے تجاویز تیار کرنا تھا۔

صدر جو بائیڈن کی طرف سے اپنی صدارتی ذمے داریاں سنبھالنے کے بعد سے وفاقی عدلیہ میں مختلف عہدوں پر نامزد کردہ شخصیات کی مجموعی تعداد اب 83 ہوگئی ہے۔

اِن قانونی ماہرین میں بہت سی خواتین بھی شامل ہیں اور کئی ایسے امریکی شہری بھی جن کا تعلق تارکین وطن کے گھرانوں سے ہے یا جو پیدائشی طور پر امریکی شہری نہیں ہیں۔

نصرت جہاں چوہدری سے قبل گزشتہ برس جون میں صدر بائیڈن نے پاکستانی نژاد زاہد قریشی کو بھی فیڈرل  کورٹ کا جج نامزد کیا تھا۔ زاہد قریشی کی نامزدگی کی سینیٹ کی طرف سے توثیق کے بعد وہ امریکی تاریخ میں کسی وفاقی جج کے عہدے پر تعینات ہونے والے پہلے مسلمان بن گئے تھے۔

زاہد قریشی کا تعلق پاکستانی تارکین وطن گھرانے سے ہے اور انہیں ریاست نیو جرسی میں فیڈرل ڈسٹرکٹ کورٹ کا جج نامزد کیا گیا تھا۔

زاہد قریشی کے والد نثار قریشی ایک ڈاکٹر تھے جو 1970ء میں پاکستان سے نیویارک منتقل ہوگئے تھے۔